Ka University of Science & Technology Meghalaya (USTM) kaba dei ka skulbah kaba la ioh jingithuh kum ka NAAC ‘A’ bad kaba don ha ka kyrdan jong ki 200 tylli ki skulbah ba paw ka ri lyngba ka jingpyllait khubor mynta ka sngi ka la iathuh ba kadei kaba la ithuh ruh kum kata ka Green Campus kaba don ia ki jaka pynlang um kiba paka katkum ka juk kaba mynta, ia kibala tip ha ka ktien nongwei kum kata ka Water Harvesting, Groundwater Recharging, Solar Power Generation bad kiwei kiwei de.
Kane ka jingpynmih khubor jong kane ka skulbah, kadei ruh lehse ban pynshai halor ka jingkynnoh jong ki myntri ka sorkar Assam ha kine ki khyndiat ba kynthup naduh u Myntri Rangbah, u Himanta Biswa Sarma, kiba la kynnoh ba ka jingshlei um jong ka sor Guwahati, kadei namar ka jingtih pathar ia ki lum ha katei ka jaka da katei ka skulbah USTM.
U Public Relations Officer (PRO) ka USTM u la pyntip ruh ba kane ka skulbah ka don ia ka rukom pynlang um kaba paka ha ki 5 tylli ki jaka pynlang kiba heh bad kiba la tip kum kita ki Natural Water Reservoirs ha kaba la lah ban pynlang ia ka umslap na ka bynta ban pyndonkam pat hapoh katei ka skulbah.
Utei u PRO katei ka skulbah, u la pyntip ruh ba la ju pynlong ia ka jingthung dieng kaba manla u snem ban pynjyrngam biang ia katei ka jaka bad pyntip ba katei ka jaka jong ka skulbah, kadei kaba rit eh haba ia nujor ia ki bynta jong ka thain Baridua terter shaduh sha Khanapara jong ka Ri Bhoi District.
U la ong ruh ba ka jingtuid jong ka umslap na katei ka skulbah sha ki bynta jong ka surok bah Guwahati-Shillong kadei kaba rit eh lada khein na baroh ka jingtuid jong ka umslap, kum shi bynta ban pynshai halor ka jingkynnoh jong ki bor sorkar ka jylla Assam.
Shuh shuh, u la pyntip ruh ba ka jingpyniar lane pynheh ia katei ka skulbah, kadon ia ki jingioh jingbit kiba biang baroh na ka sorkar jong ka jylla Meghalaya bad pyntip ruh ba ki don haduh kumba 6 hajar ngut ki samla pule ha katei ka skulbah na kylleng ki jylla ka thain shatei lam mihngi bad kumba 1500 ngut ki nonghikai bad nongtrei, da kaba pyntip ba kiba bun hi kidei na ka jylla Assam, kaba dei ka jylla kaba kham heh duh ha ka thain shatei lam mihngi.
