SHILLONG, NAITUNG 29: U Director General ka Assam Rifles, Shillong u Lt. Gen P.C Nair mynta ka sngi ha ka kyrwoh ba la phah sha ki lad pathai khubor, u la ai ka jingiaroh kaba khraw naduh ki ophisar bad sha baroh ki shipai jong ka Assam Rifles kiba la don ka bynta kaba khraw ha kaba pynneh ia ka shongsuk shongsain bad ruh ia ka jingiatylli hapoh ki jylla shatei lam mihngi ka ri India, kaba long kawei na ki lad ki lynti kumno ban dang pynkiew shaphrang ia ka ka jylla bad ka ri hi boroh kawei.
Da kaba iaroh ruh ia ki jinglen lade jongki, u Lt. General u PC Nair, u la ban khia ruh ia ki bynta kiba khraw ba la shakri da ki shipai Assam Rifles ha kaba ai jingiada ha ka ri bad kynthup ruh ha ki jylla shatei lam mihngi ka ri India bad kumjuh ruh ha Jammu & Kashmir, da kaba ki la ia khun pyrshah ban iada ia ka ri lyngba ki kam ba la bynshet bad ka jingkut jingmut jong ki ban iada ia ka ri.
U Lt Gen Nair u la ai jingiaroh ruh ia ka jingiaid lynti bad ka jinglen lade jong ki shipai Assam Rifles ba ki la kyntiew ia ka hok long trai bad ka jingiatylli hapoh ka ri. U la ai jingiaroh ruh ia ka jingshakri jongki ba khlem da shongthaid ha ka jylla Manipur, ha kaba wat la ki la mad shibun ki jingeh ha kaba pynneh ia ka shongsuk shongsain ha Manipur hynrei ki pyndep ia la kamram ba la bynshet da ka sorkar.
U la iaroh jur ruh ia ki ophisar kiba la len lada ym tang ban iakhun pyrshah ia ki jingialeh ne ka jingiakynad ki paidbah bad ki la len lade ruh ban wan rah ia ka jingiatylli ka jylla.
Haba pynpaw ia ka jingaiti ki shipai na ka bynta ka bha ka miat jong ki shipai rangbah bad ruh ki para shipai,, u Lt. Gen Nair, u la pynpaw ba dang donkam ban don kita ki shipai ba rangbah, ki ban ialam lynti na ka bynta ban dang khlain ka jingshakri ban pynneh pynsah iaka shongsuk shongsain hapoh ka ri.
U la pynpaw ruh man la u snem ha ka 23 tarik u Lber, la don ka jingleh burom ia ki shipai kiba shlur bad ruh ka jinglen lade ki shipai ba rangbah. U la leh burom ruh ia baroh ki shipai kiba shlur bad kiba la len lade bad pynpaw ruh ia ka jingiaroh kaba khraw sha baroh ki shipai ha ki kyrdan bapher bapher na ka bynta ki kam sharki jongki, kiba la long kaba jop.
Shuh shuh, u Lt. Gen Nai u la ai ka jingkhublei ba kyrpang ia u Lt. Gen Vikas Lakhera, AVSM, SM, bad pynpaw ruh ba ka Assam Rifles kan ioh shibun ki jingmyntoi na u Gen Lakhera, uba la tip kham bha ka jingshakri hapoh ki jylla shatei lam mihngi ka ri India.
U Lt Gen PC Nair, u la shakri kumba 3 snem ei ei kum u Director General ka Assam Rifle bad un sa shonthaid noh na ka kam ha ka 31 tarik u Naitung 2024 bad kynthup ruh kaba u la shakri kum u shipai la 38 snem ei ei.
