Ka kur Nongrang jong ka Bri u Hynniewtrep mynta ka sngi da ka jingsarong ka la pynkup burom ia ka Kong Idashisha Nongrang, hadien ba ka la ioh bat syndon ia ka kyrdan kum ka heh pulit ka jylla (DGP) kaba long shisha ka jingsarong ia ka kur nongrang hi baroh kawei ha ka Bri Hynniewtrep.
Ia kane ka jingpynkup burom la pynlong mynta ka sngi sha ha Tirot Sing Memorial Hall, Pyndengumiong, Mairang, ha kaba kur Nongrang naduh ki rangbah kur, ki longkmie ka kur bad ki samla da ka mynsiem jong ka jingkmen ki la pynkupburom ia kane ka Longkmie kaba la poi shaduh ka kyrdan Director General of Plice ha ka jylla Meghalaya.
Ha kane ka prokram pynkup burom, ka Kur Nongrang ka la pynpaw ruh ba kim kwah satia ban don kano kano ka jingbam sap khamtam ha ka kur Nongrang bad kum ka kur ruh ka la ai mynsiem ia ka Kong Idashisha Nongrang ba kan shim ia kata ka jingkitklhieh ban pynduhjaid ia ki kam basap kum kata ka hehduh jong ki pulit hapoh ka jylla khnang ba kan wan rah ia ka nam bad ka burom ia ka kur hi baroh kawei.
Ka kong idashisha Nongrang, ka la pynpaw ia ka mynsiem jong ka jingkmen ba ka kur ka la shim ia kane ka bynta ban ai burom ia ka da kaba pynkup burom bad ha kajuh ka por ka la kyntu ia ki nongkitkam jong ka kur Nongrang ka bri u Hynniewtrep ba kin wad jingtip khambniah halor ka jingmih ka jingiasphret ka kur Nongrang ha kaba haduh mynta ki la don haduh 11 tylli ki unit.
Ban dang pynkhlain bor shuh shuh ia ka jingiateh rasong bad ka jingiatylli hapoh ka kur Nongrang, ka Kong Idashisha Nongran ka la ai khublei kyprang ia ka kur ba ki la don ia don ryngkat ha ka jingiaid lynti jongka bad khamtam ka jingkitbok kitrwiang jongka kur kan sa lah ban shimti ia ka kam kumba la bynshet da ka sorkar.
La synran lang ruh ia ka Kong Idashisha Nongrang da ka jingdon lang u Superintendent of Police ka Eastern West Khasi Hills, u bah Maxwell B Syiem bad kiwei ki heh pulit, ki nongkitkam ka kur Nongrang kiba kynthup ia u Chief Advisers u bah Artis Nongrang, u Secretary u bah Jesmi Nongrang lem bad kiwei ki dkhot ka kur bad la pynphuh pynphieng ruh ia kane ka jingpynkup burom da ka jingshad bad ka Jingrwai na ki samla ki hep kiba rit jong ka kur Nongrang na ki unit bapher bapher.
