Shillong, Nailar 7: Ki nongialam ka HANM Western Ri Bhoi District, mynta ka 7 tarik Nailar ki la leit ban ai da ka dorkhas ha u Symbut Myntri Rangbah ka jylla u Bah Prestone Tynsong ban kyrpad na ka sorkar jylla Meghalaya ban pynurlong ia ki 3 tylli ki mat jingdawa na bynta ka jingmyntoi jong ki paidbah ba shong basah hapoh ka Ri Bhoi Sepngi.
Ia kane ka jingleh buh dorkhas, na ka Liang ka HANM Western Ri Bhoi la lamkhmat da u Samla Sumar Lyngdoh kum u President, u samla Senly Nongrum, General Secretary bad la synranlang ruh da u Bah Lamphrang Kharbani, President Rangbah ka HANM Sengkmie, samla Raiwan Sohtun Assistant General Secretary Sengkmie, nalor ki nongkitkam ka HANM Western Ri Bhoi District, u nongmihkhmat na ka shnong Belahari u Bah Artip Pator lem bad kiwei kiwei.
Ha kane ka dorkhas ba la aiti ha u Symbut Myntri Rangbah ka jylla u Bah Prestone Tynsong ka HANM Western Ri Bhoi, ka buh jingkyrpad na ka sorkar jylla Meghalaya, ban phaikhmat noh halor ka jingdonkam ia kawei ka Police Outpost hapoh ka thaiñ khappud ha ka shnong Balakhawa ban peitngor ia ka shongsuk shongshngaiñ ki paidbah nongshong shnong ha khappud ka jylla Meghalaya bad Assam, nalor kata la pynkynmaw ruh ia ka jingdonkam ban ioh noh ia u surok ba paka ha ka shnong Belahari namar ka dei ka shnong ha khappud bad ka jingdonkam ban ioh noh da ka Fire and Emergency Service lane ki kali pynlip ding ha Patharkhmah namar ka long kaba donkam bha ban iada ia ki jingjia pluh ding bapher bapher hapoh ka thaiñ Ri Bhoi Sepngi.
Na ka liang u Bah Prestone Tynsong kum u Symbut Myntri Rangbah ka jylla, u la ai ka jingkular ban shimkhia mardor halor kine ki lai tylli ki mat jingdawa jong ka HANM Western Ri Bhoi.
