Ka seng Hynniewtrep Integrated Territorial Organization (HITO) mynta ka sngi ka la pynpaw ia ka jingsngewkhia kaba jur pyrshah ia u Myntri Rangbah ka jylla, u Conrad K. Sangma, kaba dei halor ka jingkren jong u sha ki lad pathai khubor ba ka sorkar kam lah ban ai bor (NOC/Permission) ban pynlong ia kino kino ki rally ne ki prokram ha kaba u la kynniat pynban ba dei ban ai bor da ka District Administration.
Haba kren sha ki lad pathai khubor, u General Secretary ka HITO Sengkmie, u Bah Wanbun N Dkhar, u la ong ba ka seng ka da sngewlyngngoh shisha halor ka jingkren khyllung khynnah u Myntri rangbah ka jylla, kaba ia dei bad ka jingpan bor ka kynhun ki Hindu ban pynlong ia ka rally ha ka 2 tarik u Risaw 2024, ha kaba u la kren shai ban ai bor ban pynlong ia ka Rally ka dei ka bor jong ka District Administration lyngba ka ophis ki Deputy Commissioner ba ka sorkar kam don bor ei ei.
U la ong ruh kane ka jingkren laplah u Myntri rangbah ka jylla, ka dei tang ban pynthame ne da rapjot, kaba dei hadien ba katei ka kynhun shitniam ki Hindu ka la pan bor (Permission) ban pynlong ia ka rally bad kat ka kyrdan myntri rangbah u la kynniat pynban sha ka District Administration ban ai bor la ka long ia ki rally ne kiwei kiwei ki prokram.
“Katkum ka riti synshar ka ri lane ka Federal system ka sorkar, ha ka jingshisha u myntri rangbah u dei u khliehduh ka jylla, ha kaba ki District Administration lei lei ki dei tang ki unit treikam ka sorkar bad ka bor ba hakhlieh duh ka dei ka sorkar jylla” ong u Bah Dkhar bad bynrap ruh lada ki District Administration ki kham don bor ban ia ka sorkar kan mynta aiu ban don kita ki Deputy Secretary lane ki Under Secretary ka sorkar jylla, namar man ka por haba ai bor ban pynlong ia kane kano ka rally ne kiwei kiwei ki, bunsien ha ka jingthoh la thoh ba la ai bor da ka sorkar jylla (Permission Granted by the Government) bad ym ka District Administration.
Namarakata, na ka liang utei u nongialam ka HITO u la kynthoh ba kitei ki jingkren u Myntri rangbah ka jylla u Conrad K. Sangma, ka dei shisha kaba la shu kren da rapjot ne la shu thet kti, tang namar ba katei ka kynhun ki Hindu ki la bor ban pynlong ia ka rally bad ha ka jingshisha hi ka bor kaba halor tam ka dei kas sorkar jylla bad ym ki District administration, u la bynrap.
