Kawei na ka thong ba ka Nongtluh, Mathan & Marmain Development Forum ka angnud ban pynshlur iaki samla pule kiba la pass bha ha ki examination bapher bapher bad ruh kaba long ka jingpynshlur ia ki samla ba dang don ha ki jingpule, katei ka Forum mynta ka sngi ka la pynkup burom ia ki 14 ngut ki sala pule kiba la pass bha ha ka SSLC na katei ka thain Umden ba hap ha ka Nongpoh Constituency.
Ha kane ka sngi la pynkup burom ruh ia ki 4 ngut ki sala ialehkai sport kiba la ju wan rah ia ka nam ka burom ia ka thain bad ka District hi baroh kawei, da ka jingpaw jongki ha ki kam ialehkai sport.
Na ka liang kane ka Forum ka la pynkup burom ia kine ki samla da kaba pynlong ia ka jingiakynduhl ang ha Parish Hall, ka Lumsinai Parish bad u MLA ka Nongpoh Constituency u Bah Mayral Born Syiem u la wan ban shim bynta kum u kongsan bad u Chairman ka Synjuk ki Rangbah Shnong Ri Bhoi District u Bah B.B Makdoh kum u symbut kongsan.
La sakhi lang ruh ha kane ka sngi da ka jingdon lang ki nongialam shnong bapher bapher na katei kathain bad kynthup ruh u Bah Arnold Syngkli President ka NMMDF, u Babu Hesting Syiem Principal ka Nongtluh Higher Secondary School, ki nonghikai, ki khynnah skul lem bad ki kmie ki kpa.
Haba ai jingkren ha kane ka sngi kum u kongsan, u Bah Mayral Born Syiem u la pynpaw ia ka mynsiem jong ka jingkmen ba kane ka Forum ka la shim ia kane ka bynta ban pynshlur ia ki samla pule, da kaba pynkup burom ia ki samla pule kiba pas bha bad kane ka long ka jingpynshlur ia ki samla ba kin ioh mynsiem ban dang iakhun tyngeh ban poi sha ki kyrdan kiba shaneng.
Ha kane ka sngi kum u nongmihkhmat paidbah, u la ban khia ruh ia ki sala pule ne ki khynnah skul ba ki hap ban don ia ka akor ka burom ha ka long briew ka man briew, namar khlem ka akor ka burom lada ki don ka kyrdan kaba heh ruh kam don jingmyntoi, hynrei kum ki samla kiba la stad la nang kaba hakhmat eh ki dei ban tip shuwa ia ka akor long briew man briew.
Shuh shuh, u la kyntu ruh ia ka Forum bad ruh ki samla pule ba ki don ia kata ka mynsiem jong ka jingiatrei lang na ka bynta ban ai mynsiem ruh ia kiwei ki samla pule, namar kum ka dong bad ka thain ka dang donkam shibun ia ki samla kiba la biang pura ha ka klas ka kyrdan la ka long ha ki kam shakri paidbah ne ha ki kam ban shakri ia ka imlang ka sahlang ban kyntiew ia ka long briew ka man briew ha baroh ki liang, u la bynrap.
