Meghalaya, Jylliew 15: Hadien ka jinglap bad jing shem ia bun tylli ki jaka jngoh kai pyrthei bad ki krem kiba don ha jylla Meghalya, mynta ka kynti na ka liang ka Meghalya Tourism ka la pynbna paidbah ia ka jingdon sa kawei pat ka krem kaba la tip kyrteng kum ka Krem Liat Prah kaba la lap nyngkong ha u snem 2016 ha ka Shnongrim East Jaintia Hills bad kaba jngai kumba 112 km na Nongbah Shillong.
Ka Krem Liat Prah ka don ia ka jingjngai ne jingjrong kumba 34 km, na ka bynta kito kiba angnud ban poi sha kane ka krem kaba itynnad hapoh ka jyll Meghalaya, ki lah ban rung bad ban lap ia ka jingitynnad ka jong ka ha ka rukom long ohshrong jong ki maw bad ka jingkhuid jong ka um kaba don hapoh kane ka krem bad kaba la ioh ruh ia ka nam ka krem kaba jrong tam ha India bad ia ki 150 tylli kiwei pat ki krem kiba la kham paw kiba don lypa ha ka jylla Meghalaya.
Khyndiat shaphang kane ka Krem Liat Prah, la iathuh, ba la tip ia ka kum ka Krem kaba jrong tam hapoh ka South Asia (Longest Natural Cave) ia kaba la ai nam ne sin kyrteng ruh ia ka kum ka Krem ki Khla (Cave of the Tiger) ka dei ruh ka krem ba jrong bad ka jingdon jong ki mawshun kiba ohshrong bha da ka jinglong jingman jong ka um kaba don hapoh jong kane ka krem kaba la nang wanrah ia ka jingitynnad hapoh kane ka krem.
Ka Krem Liat Prah ka dei kawei napdeng ki 150 tylli ki krem ba la jurip bad peit bniah ha ka jingleh ia ka Survey katkum ka Abode of the Clouds Expedition Project, ka jingjrong jong ka ka don kumba 34 kilometers bad ka nang lah ban kiew ha ka liang ka jingjrong namar ka jingdon jong kiwei pat ki Krem kiba marjan kiba lah ban pyniasoh biang
Ka jinglong kyrpang jong katei ka Krem Liat Prah’s ka long ruh namar ka jingdon jong ki lynti rung kiba itynnad bad kiba pynshoh biej bha ia ki nongleit nongwan kiba ju sngewtynnad ban rung ne leit jngoh shapoh ki krem.
PAW KA KREM LIAT PRAH KUM KA KREM KABA JRONG TAM HA KA RI INDIA
