Ka Khun Hynniewtrep National Awakening Movement (KHNAM), ka la pynpaw ia ka jingpyrshah kaba jur halor ka jingkynnoh ba ka sorkar kan thung noh ia ka Agatha K. Sangma, kaba dei ka para u myntri rangbah ka jylla u Conrad K. Sangma bad ka MP barim ka Tura kim ka Chairperson ka Meghalaya State Commission for Protection of Child Rights (MSCPCR).
“Ka KHNAM ka la pynpaw ia kane ka jingpyrshah ban thung ia ka Agatha Sangma kum ka Chairperson ka MSCPCR da ka sorkar jylla lyngba ka sorkar MDA” la ong u Working President ka KHNAM u Bah Thomas Passah ha ka kyrwoh ba la phah sha ki lad pathai khubor ha ka sngi Saitjain.
“Ka jingthung Advisor, Chairman, Vice Chairman da ka sorkar ka dei kaba hap ban pynlut da ka pisa sorkar, ha kaba bun ki paidbah ki ju pynpaw ia ka jingsngewkhia bad kim hun satia. Ha kane ka kynti, ka paw shai ba ka sorkar MDA ka la shu thung klumar ia ki post bapher bapher tang ia kito kiba don jingiadei bad kane ka paw shai ba ka dei ka jingleh donbor” u la ong.
U la nog ruh ba ka KHNAM ka sngewlyngngoh ban tip ba u James Sangma ruh u dei uba don kti ha kaba shim rai ha kaba u la phah jingthoh sha ka sorkar, kumno ki paidbah kin kren halor kane ka rai jong ka sorkar. Ngi tip ruh ba kiwei ki party kiba don ha ka sorkar MDA kin nym pyrshah ia kane kane namar ki don ia ka bhah ioh jingmyntoi ha kaba thungkam iano iano lyngba kaba ngi tip paidbah kum ka Political Appointment.
Shuh shuh, la bynrap ruh ha katei ka kyrwoh ba katkum ka Notification dated 10 Naitung 2013, la kren shai ” Ba ka jingthung Chairperson ki dei ban long ki briew kiba la paw bad kiba la leh shibun ki kam kiba khraw na ka bynta ban kyntiew ia ka hok ki khynnah, ngim shym la iohi ba ka Agatha Sangma kan ioh ia ka bynta ban shah thung kum ka Chairperson bad kum kane ka jingthung klumar kan ktah ia ka hok jong ki khynnah hapoh ka jylla.
