Ka 19-South Shillong Advisory Committee (SSAC) mynta ka sngi, ha ka shithi ba la aiti sha ka Expert Committee, ka la tyrwa ba dei ban bhah kam 27% na ka bynta kito kiba duna ha ka ioh ka kot bad ba la tip ruh ha ka ktien nongwei ‘Economical Weaker Section’ (EWS).
U Chairman ka South Shillong Advisory Committee bad uba dei ruh u MLA ka South Shillong Constituency, u Bah Sanbor Shullai, ha ka shithi ba la phah sha ka EXpert Committee mynta ka sngi Nyngkong, u la ong ba ka Committee ka la ai jingmut ne tyrwa ha ki san tylli ki bynta, ba kynthup 30 percent na ka bynta ki Khasi-Jaintia ST, 30 percent na ka bynta ki Garo ST, 27 percent na ka bynta kiba duna ka ioh ka kot (EWS), 6 per cent na ka bynta ki ST/SC & OBC bad 7 percent na ka bynta kito ki bym shym la bhah kyrpang (unreserved).
U la ong ruh nalor ka 27 percent ba la tyrwa ban bhah kam na ka bynta kito kiba duna ha ka ioh ka kot, ka Committee ka la tyrwa ruh 87%, dei ban bhah kyrpang na ka bynta kito kiba duna ha ka ioh ka kot, kiba dei na ka thup jong ki Khasi-Jaintia bad Garo, 6% na ka bynta kito kiba dun ha ka ioh ka kot, kiba dei na kiwei pat ki ST, 3% na ka bynta ki SC bad 3% na ka bynta ki OBC bad ruh 7% na ka bynta kito kiba duna ha ka ioh ka kot na ka bynta kito kiba khlem pat mang kyrpang (Unreserved).
“Na kitei kiba kdew bad pynpaw ha ki san tylli ki bynta haneng, 10% dei ban bhah kam na ka bynta kito kiba duna ha ka liang ka dkhot met (PWD) bad ruh na ka bynta kita ki samla ki ba paw bad don sap kyrpang ha ki kam ialehkai sport, ki kam dro ne ki kolshor” ong u Bah Shullai.
U Bah Shullai kum u Chairman ka Committee, u la ai jingmut ruh ba dei ban bhah kam kyrpang ruh na ka bynta ki bar jylla kibala don hok ha ka thup jong ka OBC bad na ka bynta kito ruh kiba don hok bad kiba hap ha ka thup ST. Ka Committee ka la ai jingmut ruh ba dei ban bhah 3% na ka bynta ki OBC bad SC bad 3% na ka bynta ki ST.
U la pynpaw ruh da kaba ong ba ka Committee ka la ai jingmut, lada ym don kita ki samla wad kam kiba dei na kiwei ki ST, SC , OBC bad ki bym pat bhah kyrpang na kino kino ki District, dei ban kham bhah kyrpang na ka bynta kito kiba duna ha ka ioh ka kot lada dei ha Khasi-Jaintia bad na ka bynta ki Garo ha Garo Hills lada dei ki post ha ki District lane Sub Divisional Post.
Shuh shuh ka Committee ka la ai jingmut ruh ba na ka bynta ki District Level Posts lane ki Sub Divisional Posts, na ka 87% kiba bha na ka bynta ki Khasi bad Garo, 50% na ka bynta kito kiba duna ha ka ioh ka koit kiba dei na ka Khasi bad Jaintia Hills District bad ruh Garo fona ka bynta ki Garo ha Garo Hills, u la bynrap.
