U President ka Meghalaya Pradesh Congress Committee (MPCC), u Ma Vincent H. Pala ha ka sngi Thohdieng u la pyntip ba ka party Congress kan sa leh da kaba tyngeh ia kino kino ki MLA ka party Congress kiba thmu ban leit pyniasoh sha ka party NPP.
Kane ka jingkren u u President ka MPPC, ka dei hadien ba la mih ki hamsaia ba ki la don katto katne ki MLA jong ka Congress party kiba la thmu ban leiti pyniasoh sha ka party NPP. Na ka liang ka party Congress ka la dep ruh ban sospon ia ki ar ngut ki MLA ba kynthup ia u Bah Charles Marngar, MLA bad MDC ka Mawhati bad u Bah Gabriel Wahlang, MLA ka Nongstoin, ba la kynnoh da ka party ba ki la pynkhein ia ki kyndon treikam jong ka party Congress.
Kumba u President ka MPPC, u Ma Vincent H. Pala u la ong ba ka party kan shim da ki lad kiba tyngeh pyrshah ia kino kino ki MLA kiba pynkhein ia ki riti treikam ka party, ka dei ha ka jingialang kaba la long ha ka Sngi Thohdieng ha Congress Bhavan, ba la ia don lang naduh u MP ka congress na Tura u Saleng A. Sangma, u Bah Ronnie V. Lyngdoh, uba dei u nongialam ka CLP, u ka Working President, Deborah Marak, u Bah P.N Syiem bad kiwei kiwei ki nongialam ka party.
Ha kane ka jingiakynduh lang, kitei ki nongialam ki la pynpaw ruh ia ka jingsngewkhia ia ki 3 ngut ki MLA kiba thmu ban leit pyniasoh sha ka party NPP.
