U Ratan Tata u wei na ki trai kompani kiba heh hapoh ka ri India bad u ba dei trai ruh jong ka kompani Tata bad u ba riewspah bha hapoh ka ri India, u la mih shakhmat ban pan jingiarap na ki riew paidbah ban pynioh snam na bynta u wei u ksew ba dang 7 bnai u ba dang shah sumar hapoh ka hospital sumar mrad kaba don ha Mumbai.
Ia kane ka jingkyrpad jingiarap, u Ratan Tata u la thoh ha ka rynsan social media jong ka Instagram, da kaba u la thoh ia ki kyntien, ‘Mumbai, I need your help’ kaba kdew ba u Ratan Tata u kyrpad ia ki riew paidbah ban pynioh snam na ka bynta u ksew u ba la ri bad don hapdeng ka jingshitom bad donkam snam kyrkieh.
Ia u ne u ksew, ba la ri da u Ratan Tata la pyntip, ba u don ka jingshitom shit kaba jur (tick fever) bad ka jingduna snam kaba shyrkhei (life threatening anaemia), ha kaba u Tata u la thoh ruh, “Ba ngan jin da sngewnguh eh ia kito ki riew paidbah kiba kloi ban ai jingiarap ban pynioh snam kyrkieh ia u ne u ksew ba shitom eh ba u la ri la sumar mynta hapoh ka hospital jong u ha Mumbai.
