Shillong, Naiwieng 24: Haba sdang ka I-League ka samoi ialehkai jong u snem 24/25 bad ba ka Shillong Lajong Football Club, ka la sdang ia ka jingiakhun kaba nyngkong da kaba pdiang ia ka jingiakhun ha la iing, kata da ka jingiakhun pyrshah ia ka Churchill Brothers bad ha katei ka sngi sdang jong ka Shillong Lajong ka la kut noh ha ka jingiakhaid kaba 2-2.
Haba phai sha katei ka jingiakhun hapdeng ka Shillong Lajong pyrshah ia ka Churchill Brothers, ka long ba ka Churchill Brothers ka la lah ban lamkhmat ia ka jingiakhun lyngba ki arkol ia kaba la thep da u Wayde Lekay, uba la ioh ban thep kol ha ka minit ba 14 bad ha ka minit ba 21 jong ka kylla step.
Ki rangialehkai ka Shillong Lajong, kim shym la duh mynsiem wat haba ki la shah thep kol tang ha ki khynndiat minit ba la sdang ka kylla step bad kumta katba ka jingiakhun ka dang iaid shakhmat, ka Shillong Lajong ka la ioh ban pynphai nyngkong da shikol ia kaba la thep da u Dounglas Tardin, uba la thep ha ka minit ba 35 jong ka kylla step bad kaba ki la pynkut ia ka kylla step, da kaba ka Churchill Brothers ka tam ia ka Shillong Lajong da 2-1.
Haba bteng ka kylla miet, ki rangialehkai ka Shillong Lajong, ki la iakhun tyngeh na bynta ban pynphai ia katei ka kol kaba ki la shah thep bad haba kum katei ka jingiakhun, dei ha ka minit ba 51 ba ka Shillong Lajong, ka la ioh ban pyniakhaid ia ka jingiakhun lyngba ka kol kaba la thep da u Renan Paulino bad kaba la neh haduh ba kut ka kylla miet, kaba la pynlong ruh ia kitei ki ar kynhun ba kin hun da kaba iasam mar shi poin haba sdang jong ka I-League jong ka samoi 24/25.
