Ki nongialam ka Balang U Blei Meghalaya-Assam bad kiba dei ruh ki nongpyniaid bad nongkhmih ia ka Jingaiei Rehabilitation Center ne ka jaka ban ai jingsumar ia kito ki samla kiba la kyrni ha ki jingdih pynbuaid kaba don Syadrit, Ri Bhoi, mynta ka sngi ki la ioh ban rakhe kyrpang ia ka jingdap ba shisnem, halor ba ki la lah ban ai kata ka jingshakri, ban sumar ne ban pynkylla dur ia kito ki samla kiba la ngop ha ki jingdih bapher bapher.
Haba rakhe ia ka jingdap ba shisnem ka Jingaiei Rehabilitation Center, la sakhi da ka jingdon u Bah Pyniaid Sing Syiem, Chief Executive Member ka Khasi Hills Autonomous District Council (KHADC), nangta kiwei pat ki Pastor, kiba kynthup ia u Pastor GA Kharshïing, u Pastor M Shangpliang, u Pastor R Imiong, Pastor AM Mihsil, Pastor K Nongpluh, ki nongshah sumar ha kane ka jaka lem bad kiwei ki para ba ngeit ka Balang U Blei.
Ki Pastor jong ka Balang u Blei, haba ki ai jingkren ha katei ka sngi, ki la pynpaw ba kam dei kaba suk ia ki ban kin pyniaid ia katei ka jaka ban sumar ia kiba la ngop ha ki jingdih ba pynbuaid bad khamtam eh ban pynkylla dur ia ki, ha kaba don ki khep ba ki duh mynsiem bad ba ki la sngewdei ban pynkut noh ia katei ka jaka, hynrei dei lyngba ka bor Blei, ba ki la lah ban pyniaid beit na bynta ban ai jingsumar ia kito ki samla kiba la ngop ha ki jingdih.
Shuh shuh, ki la pyntip ruh ba kumba ka dei ban long, katei ka jaka sumar ka dei ka jaka ka ban ai jingsumar tang na bynta 10 ngut ki briew, hynrei kumba ka long mynta, ki don haduh 12 ngut, naba ar ngut la pdiang iaki hadien ka jingpyrkhat sani bad ka jingdonkam ban ai ia ka jingsumar iaki ba kin ioh ia ka jingim kaba thymmai.
Katba na ka liang u Bah Pyniaid Sing Syiem, haba kren ha kane ka sngi, u la pynpaw ia ka jingsngewkmen ban iadon bynta ha kane ka jingdap shisnem jong ka jingiaid lynti kane ka Rehabilitation Center ban pynkylla thymmai ia ka jingim jong ki samla kiba la ngop ha ki jingdih.
Lyngba jong katei ka sngi, na ka liang u Bah Pyniaid Sing Syiem, u la pynbna ba na ka liang ka KHADC kan mang tyngka kumba T. 10 lak na ka bynta ban pynheh bad thaw thymmai shuh shuh ia ki kamra ha katei ka jaka, ha kajuh ruh ka por na ka liang u Myntri Rangbah ka jylla, u Conrad K Sangma u la pynmang T. 5 lak tyngka na ka skhim Chief Minister Special Development Fund.
