Kum kawei ka kynhun ki nongsynshar Shnong ha Ri Bhoi, ka Synjuk ki Rangbah Shnong Ri-Bhoi District mynta ka sngi ka la kynduh syndon ia u Deputy Commissioner ka Ri Bhoi, u Abhilash Baranwal, kaba dei halor ka jingud jingnam ki paidbah kiba phah ban leit sumar ha Civil Hospital Nongpoh bad ruh halor ka jingjia kaba la jia dang shen ba kawei ka longkmie kala kha khun ha Paiñkhana haduh ba I khyllung I la khlad noh syndon ha katei ka jingjia.
Haba kren sha ki lad pathai khubor hadien ka jingiakynduh ia u Deputy Commissioner ka Ri Bhoi, u Bah P.B Sylliang General Secretary ka Synjuk, u la ong ba kum ka Synjuk ka la wan ban ia kynduh ia u Deputy Commissioner ka Ri Bhoi bad la ai ruh ia ka dorkhas na ka bynta ban pynsngew halor katei ka jingjia kaba la jia ha Civil Hospital Nongpoh ba kawei ka longkmie ka la duh ia la I khyllung haduh ba poi u pud ban kha sha Painkhana.
Na ka liang utei u rangbah nongialam u la pynpaw ruh kane ka jingjia ha Civil Hospital Nongpoh kam dei shuh ka sien kaba nyngkong bad la bun ki khep ba ki paidbah ki ia kynduh jingeh bad dei halor kane ka Nongrim ka synjuk ka hap ban ai jingthoh sha u Deputy Commissioner na ka bynta ba kum u khliehduh ka District u hap ban shim khia ban ia kren na ka bynta ban pynbha ia ka jingtreikam bad ka jingshakri ha katei ka jaka ai jingsumar khnang ba kan nym ktah ia ki paidbah ba pang ba shitom ha ki sngi bad ki por ban sa wan.
“Kawei ka jingjia kaba la jia teng ha katei ka Hosptal ka dei ruh ka jingjia ba ka samla kala phlei snam naka jinglait u pipe drip bala kynnoh ruh ba ki nongsumar kim shym la patiaw wat hadien bala khot bunsien bad shibun ki jingjia haki por bala dep” u la ong.
U la ong ruh ba ka synjuk kam kwah ba nangne shakhmat kin dang don kiwei kiwei ki jingjia ba sngewsih pyrshah ia ki nongshah leit sumar bad kum ka synjuk ka kyntu ba ki bor ba dei peit ki hap ban don lang kata ka jingkitkhlieh khnang ba ka jingdon katei ka Hospital kan ai shisha ka jingshakri ia ki paidbah.
Kumba la aiti ia ka dorkhas, ka synjuk ka la kyntu ruh ia u Deputy Commissioner ka Ri Bhoi ba un shim khia halor kane ka phang ba la pynsngew bad na ka liang ka Synjuk kan jin da la sngewnguh lada ka don kata ka jingkitkhlieh ban pynbha bad ban pynjanai ia ka jingshakri ha katei ka jaka a jingsumar ka District.
Shuh shuh, ha kawei ka bynta ka Synjuk kala ioh ruh ban ïakren bad u DC halor ka jingpynslem ïaka Result DSC kaba ki samla pule kila dep ban thoh eksam mynta la katto katne snem bad kyntu ruh ban pynmih noh ïaka result DSC haka por kaba biang bad naka liang u DC ka Ri-Bhoi u la kular ban shimkhia ïa katei ka kam ba ka Synjuk kala pynsngew ha kane ka sngi.
