Hapdeng ki jingduna kiba bun naduh ki tiar bad ka jaka ïalehkai kum ka Matress, Ka Kickboxing Association jong ka Ri Bhoi District kaba la don ka jingïasnohkti bad ka MMAF mynta ka sngi ka la Ïoh ban pynlong biang ïaka lympung iakura kaba la tip ka District Level Kick boxing Championship kaba 10 ïa kaba la pynlong haka shnong Ñiangbari Lum, Ribhoi District.
Ïa kane ka lympung ïa kura kaba arsngi la wan ban plie da u Bah Balajied Rani MDC ka Nongpoh haka jingïadonlang u bah Thomas Rongthaluh President ka Meghalaya Martial Arts Federation (MMAF), Bah Elfast Shadap Rangbah Shnong Niangbari Lum lem bad kiwei kiwei…
Haba phai pat sha katei ka lympung, la wan ban ïa shim bynta haduh 63 ngut ki khun samla jong ka thep Ri Bhoi kiba kynthup naduh ki Heprit haka kyrdan junior bad ki Samla kynthei bad shynrang haka kyrdan Senior. Wat la kitei ki rang bad ki thei ïa kura ki hap ban ïa khun ha katei ka rynsan ïa kura daki tiar ki bym biang kum ka Glove, ka Chess Guard bad kiwei kiwei hynrei namar ka jingthrang jong ki ban poi sha ka State Level kitei ki Nongïakura ki la la ïa shim bynta shit rhem dakaba pyni ruh ïaka sap ka phong jong ki.
U Bah Thomas Rongthaluh, President ka Meghalaya Martial arts Federation u la ïathuh ba naduh ki por ba u la sdang ïa katei ka lympung haduh ban poi kane ka wat ka 10 naka liang jong ki kum ka kynhun kim shym la ïoh ïa kino kino ki lad jingïarap ha kaba ïadei bad ki tiar ïalehkai bad ka jaka ïalehkai lane ka Mattress. U la kyrpad ïaki bor ba halor ba kin phai khmat lem sha kane ka Jingïalehkai dakaba ïarap ban pyndap ïaki jingdokam katkum ka jingdawa jong kane ka Jingïalehkai khnang ba kin lah ban Nangsei shuh shuh ki rang bad ki thei ïa kura kiba kynsai.
