Nongpoh, Rissaw 18: Kum shi bynta ban pynmih pisa na ka bynta ka jingdonkam ha ka kam ka jong U Blei, ka seng samla jong ka Balang Katholik Nongmawlong mynta ka sngi ka la shim ia ka sienjam ban pynlong da ka jingialehkai phutbol ba ar sngi, khnang ban lah ban pynmih pisa na ka bynta ki jingdonkam hapoh ka Balang.
Ia kane ka jingialehkai phutbol la pynlong ha madan ialehkai ka Shnong Umtasor Nongrim Jyrmie bad la wan ruh ban plie pyrda da u Bah Rocky Marwein kum uwei na u samla rangbah ka Ri Bhoi bad ha ryngkat ka jingdon lang ki nongialam ka Seng Samla Balang Katholik Nongmawlong.
Ha kane ka lympung ialehkai phutbol ba 2 sngi, la wan ban shim bynta haduh 20 tylli ki kynhun ialehkai na katei ka thain bad ia kane ka jingialehkai la pynialeh lyngba ka Knockout system.
Ha kane ka sngi, ba la plie pyrda ia ka jingialehkai phutbo, la ialehkai hapdeng ka Nongmawlong pyrshah ia ka Mawiapbang bad ka Nongmawlong ka la ioh khur ia ka nam jop da kaba ka la pynrem noh ia ka Mawiapbang da 4-2 kol kaba dei lyngba ka jingiashut tie breaker.
Haba kren ha katei ka sngi naka liang u Bah Rocky Marweiñ kum u kongsan u la ai ka jingïaroh ïaki khun samla jong ka Balang Katholik Nongmawlong kaba la shim ïa katei ka sienjam ban pynlong ïa katei ka lympung naka bynta ban pynmih pisa ïa shibun ki jingdonkam naka bynta ka kam jong u Blei, bad kum uwei na ki samla rangbah ba ju trei naka bynta ka imlang ka sahlang u la aiti ruh ïaka song pisa sha ki khun samla jong katei ka Balang kum ka jingkyrshan bad don bynta lang ha katei ka lympung.
Shuh shuh, u la kyntu ruh ïaki khun samla ha katei ka sngi ba kin im ka jingim kaba long ka nuksa ïa kiwei ki samla kiba dang rit ka rta bad kiar naki jingmlien ba sniew kum u drok bad kiwei kiwei ki jingdih buaid kaba ktah ïaka koit ka khiah, ka longrynieng bad ïaka imlang ka sahlang hi baroh kawei.
