Ka kynhun ialehkai Tribal Football Club, ka la rah ia ka nam lahduh ha ka lympung ialehkai kaba la tip kum ka 9-A-side Knock-out Football Tournament, ia kaba la pynlong da ka Maikhuli Evergreen Social, Cultural & Sport Club, hadien ba ka la lah ban pynliem noh da 5-3 pyrshah ia ka YEG ka kynhun ialehkai na Mawkhuli ha ka jingiakhun kaba la poi sha ka jingiashut Tie Breaker.
Khyndiat haba phai sha katei ka jingiakhun, ka long ba ka kylla step jong ka jingiakhun ka la kut noh ha ka jingiakhaid kaba ym don kiba pynkhih jar. Haba la bteng ka kylla miet ka jingiakhun ka la shongshit eh, namar ki rangialehkai na kitei ki kynhun, ki la ialehkai bha, na bynta ban iohrah ia ka namlahduh ha katei ka jingiakhun, hynrei haduh ba kut ka kylla miet, ka jingiakhun ka la long ba kitei ki kynhun ki la ioh thep mar shi kol bad kiba la pynkut ia ka jingiakhun da ka jingiakhaid kaba 1-1.
Ban rai ia ka kynhun lahduh ha katei ka jingiakhun, ki nongpyniaid ki la rah noh sha ka jingiashut Tie Breaker bad dei ha ka Tie Breaker, ba ka Tribal FC ka la lah ban pynliem noh ia ka YEG da 5-3 bad khur syndon ia ka nam lahduh ha katei ka lympung ialehkai.
Ka Tribal FC kaba la rah ia ka nam lahduh, ka la khur ia ka song pisa kaba T. 30 hajar lem bad ka Trophy, katba ka YEG kaba la shah rem noh, ka la khur ia ka song pisa kaba T. 15 hajar lem bad ka Trophy.
Haba pynkut ia katei ka lympung ialehkai phutbol, la sakhi da ka jingdon u Bah Sosthenes Sohtuh, MLA Jirang, kum u Kongsan, nangta u MC Omi Ningshen, IRS kum u symbud Kongsan, u Bah S. Khymdeit, OC ka Pilangkata Police Outpost lem bad shibun ki riew rangbah na ka thain Maikhuli.
