Hadien ba la don ka jingdawa na ki para dkhot nongialam ka HNYF Northern Region ha Ri Bhoi District ba dei ban jied thymmai noh ia ki nongialam bad na ka liang ka seng kmie hadien ba la ai por katto katne por ban ia pynbeit mynta ka sngi ki la pynlong ia ka jingialang na ka bynta ban jied tang ia ki nongialam ba hakhmat kata kynthup ia u President, General Secretary bad ruh ia ka kyrdan Vice President hapoh jong ka jylli treikam ka seng.
Ia kane ka jingialang ban jied ia kine ki nongialam ba hakhmat la pynlong ha Dorbar Hall, Sajer, ha kaba la don ryngkat u President ba rangbah ka seng HNYF u Bah Sadon Blah, u Bah Marcus Marten, uba dei u President barim bad u bym shym ia la ia khun shuh ia ka post President bad kynthup kiwei kiwei ki nongialam.
Ha ka post President la ia khun hapdeng u Bah Heasting Lyngdoh bad u Bah Edelbert Nongrum, ha kaba u Bah Heasting Lyngdoh u la shah jied kum u President ka HNYF Northern Region, u Bah Alfred Mallai u la shah jied kum u General Secretary bad u Bah Eldelbert Nongrum pat u la shah thung kum u Vice president, hadien ba u la rem ia ka post President.
Ia kiwei kiwei ki nongialam ne ki post bapher bapher, ka seng kan sa pynlong hadien ban jied biang ia kita ki nongialam bad kynthup ruh ban pynskhem ia kine ki nongialam ba thymmai ka HNYF ha Ri Bhoi.
Kumba la kren da u President ka HNYF Sengkmie u Bah Sadon Blah bad ruh u President ba thymmai ka HNYF Northern Region ha Ri Bhoi, ka thong kaba ka seng HNYF ka la jied biang ia kine ki nongialam ba thymmai, ka long ban bteng ia kata ka jingshakri na ka bynta ki paradoh ki parasnam bad ruh ba kin phai khmat kyrpang ia ka jingeh ki paidbah ha Ri Bhoi District.
Na ka liang u Bah Sadon Blah ruh kum u President ba rangbah ka seng HNYF, u la kyntu ia kine ki nongialam ba thymmai ba kin shim ia kata ka lyngkor nongialam na ka bynta ban pynkhlain ia ka jingshakri khamtam ban ai kata ka jingiada kaba kyrpang ia ki paradoh ki parasnam bad ruh ba kin long kita ki nongialam kiba don ka jingkitkhlieh ban kyntiew ia ka dong bad ka thain khnang ban myntoi u paradoh u parasnam jong ka ri bad ka jaid bynriew jongngi.
