Shaei yn poi ka jaidbynriew, haba la im tang ka kdew kti ia kiwei bad khlem jingsngewnguh: Prestone

Sohiong, Jymmang 30: Haba kren ha ka jingialang ban ialap ia kane ka ilekshon MP Shiteng Samoi, kaba la long hynnin ka sngi ha Sohiong, u Bah Prestone Tynsong, u la kren ia ki kyntien kiba pynpaw ia ka jingsngewdiaw halor ka jinglong jingman ha ka Jaidbynriew bad uba la ong ba kumba ka long mynta, ka Jaidbynriew kaba la shu im tang ban kdew kti ne kynthoh ia kiwei bad ka Jaidbynriew ka bym don shuh ia ka mynsiem ban sngewnguh ia kiba lehbha.

U Bah Prestone Tynsong, u la kren ia kitei ki kyntien, ha ka sngi ba ka NPP ka la ialam ilekshon na bynta u Dr. DRL Nonglait bad kaba dei ruh ka sngi, ba ka NPP ka la pdiang sha ka Party ia ki nongialam bad nongkyrshan na kiwei ki Party, kiba la pyniasoh noh ialade sha ka NPP.

Ha katei ka jingialang ialap ilekshon, u Bah Prestone Tynsong, u la ong ba katba ka sorkar ka dang shakri bha ia ki paidbah, da kaba wanrah ia ki kam pynroi bapher bapher ha ka jylla, hynrei la shu mih beit tang ki jingkynthoh bad kdew kti ia kiwei, khlem da don kata ka mynsiem ban sngewnguh.

Sa pule ruh | Ka Ri-Bhoi ka don hok ban ioh Medical College, shibun ki mat pynsngew u MLA hakhmat u myntri sorkar

“Kumba ka long mynta lei, la shu mih beit tang ka jingkynnoh nongtuh, watla ka sorkar ka la lah ban lehbha ia ki paidbah, lada dei shisha ki nongtuh, balei kim ujor ejahar sha ki Pulit, khnang ba ki Pulit kin kem bad tohkit, khnang ban lap ia ka jingshisha” ong u Bah Prestone Tynsong.

Nga pangnud haba iohi ia ka jinghiar dor ka jaidbynriew, ha kaba kat ia u Dr. DRL Nonglait, uba dei u riew don burom bad uba la long u heh ha skulbah NEHU, hynrei dang don kiba kren bein da ki kyntien kiba laiphewjait bad kaba la ktah shisha ia ka akor u khun Khasi Khara, la bynrap u Bah Prestone Tynsong.

Namarkata, u Bah Prestone Tynsong, u la kyrpad ia ki riew rangbah, ki longkmie longkpa bad khun samla, ba kin kiar na kaba kdew kti ne kynthoh palat ia kiwei bad ba kin don ruh ia ka mynsiem ban sngewnguh ia kiba la lehbha bad ha kajuh ruh ka por, u la kyrpad ia ki paidbah ba kin kyrshan bad pynjop don burom ia u Kyrtong ka NPP u  Dr. DRL Nonglait, ha kane ka ilekshon Shiteng Samoi, namar u dei u briew uba la mih eh ban iasaid na bynta ka Jaidbynriew hapoh ka Iing Dorbar Lok Sabha.

Sa peit ruh