Ka party Bharatiya Janata Party (BJP) ka la rai ban pynieng kyrtong na ka bynta ban ia khun ia ka election shiteng samoi na Gambegre Constituency, kaba dei hadien ba na katei ka Constituency, U Saleng Sangma u la hap ban iehnoh kam noh kum u Nongmihkhmat, kaba dei hadien ba u la jop kum u MP ba thymmai na ka Tura Parliamentary seat ha kane ka election MP sha Lok Sabha kaba dang shu dep shen ha ka ri.
Haba kren halor kane ka phang, u State President ka BJP, u Rikman G Momin, u la ong, “ ba ka party ka la dep ban pyntip sha ki Nongialam ka Central ba ka party ka la rai ban pynieng kyrtong ha katei ka election shiteng samoi, bad na ka liang ki nongialam ka Central ruh ki la ai ka jingmynjur, hynrei na ka daw ba don katto katne ba hap ban pynkylla, ka party ka hap ban kyrpad biang ia ki nongialam ka Central bad wat la katta ruh ka party BJP ka la thikna ban pynieng kyrtong ha katei ka election shiteng samoi”.
Haba kylli, la ka dei neem ba ka party BJP kan pynieng da u State Vice President ka BJP bad uba dei ruh u MDC ka Tura, u Bernard N. Marak ba u long kum u kyrtong ha katei ka election shiteng samoi, u Momin u la ong, “Ba ka party BJP haduh mynta kam pat shim ia kano kano ka rai ba iano ka party kan pynieng kum u kyrtong bad wat la katta ruh u Bernard N. Marak, u la trei shitom bha ban pynkhlaiñ ia ka party bad lada long kaba lah u dei ruh ban ioh ia ka ticket kum u kyrtong ban ia khun ha kane ka election shiteng samoi na Gambegre Constituency”.
U la ong ruh ba ka BJP ka la rai ruh rangbah ban iakhun ha kane ka election shiteng samoi na Gambegre Constituency bad kam donkam hi ruh ban pan jingkyrshan na ka NPP party kaba lamkhmat ha kane ka sorkar synrop (MDA) hapoh ka jylla.
U la ong ruh em, ngin pyniakhun beit ha kane ka election shiteng samoi bad balei ngin donkam ia kata ka jingkyrshan ka NPP bad ngim donkam hi ruh ia ka jingkyrshan ka NP. Ngi dei ka party kaba kham pher, namar ka NPP ka dei kaba synrop lang hapoh ka shatri ka NDA, kaba ngi burom u myntri rangbah ka ri, dei namar kata ka daw ka party BJP ka kyrshan ia ka NPP ha akne ka election MP ba dang shu dep shen.
U Momin, u la kyntait ruh mardor, ha kaba da ka jingkyrshan ka NPP, kan sa ktah ia ka jingioh vote ka BJP.
Kum u State President ka BJP, u la kynnoh ruh ba ka dei ka jingshisha ba kam don kano kano ka kam pynroi ha Gambegre Constituency, ha kaba la mihkhmat la 15 sem ei ei da u MLA barim u Saleng Sangma bad uba la shah jied ruh kum u MP ka Tura.
Ha kawei ka bynta, u State Spokesperson ka BJP, u Bah M. Kharkrang u la ong, “ Ba ka party BJP ka la angnud ban iaid hi tang ka party BJP ha kane ka election MP ba dang shu dep shen, hynrei ka don ka jingbthah na ki nongialam ka Central ban kyrshan ia ka NPP, kaba ngi hap ban kohnguh ia ki nongialam ka Central. Ha kane ka kynti, ngi la pynpaw ruh ia ka jingsngew ban ka party kan pynieng kyrtong na Gambegre bad ka party ka kyrmen skhem ruh ba ki nongialam na ka Central kin sngap ia ka party na ka jylla ban ailad ba kin pynieng kyrtong ha kane ka election shiteng samoi na Gambegre Constituency, u la bynrap.
Kumba la don ka jingiasylla ba la dawa ban weng noh ia u Rikman G Momin kum u State President ka BJP, u Bah Kharkrang u la ong,” Phi la kylli palat ia kajuh shi kajuh ka jingkylli bad nga la ju ong ruh ba kam don ei ei kaba kum kata. Namarkata, ki don katto katne, kiba ym hun satia bad ka party bad ki lah ban dei kita kiba shna ia kane ka khana”.
Shuh shuh, u la bynrap ruh da kaba ong, “ Baroh kum ki nongialam ka party BJP ngi ia don kata ka jingiatrei lang bad ka don pat ka khep kaba ngi don kata ka jingbym ia sngewthuh jingmut, ha kaba la lah ban pynbeit noh hapoh ka party bad ngam thikna pat ba kan don kata ka jingiapait ia pra hapoh ka party kumba long haduh mynta” u la bynrap.
