Ha ka jingiakhun ka Durand Cup kaba la long mynta ka miet ha Nongbah Shillong, ka FC Goa ka la lah ban pynliem noh ia ka Rangdajied da 4-3, ha ka jingiakhun kaba iakhaid bad itynnad bha ha madan JN Stadium, Polo.
Ka jingiakhun ka dei kaba la sdang ha ka por 7 baje mynmiet. Ha ka jingiakhun ka Rangdajied United FC ka la ioh ia ka kabu ka nyngkong ban pynkhihjar lyngba Owanijuh uba la thep ha ka minit ba 19 bad kiba la pynkut ia ka kylla step da 1-0.
Haba bteng ka kylla miet jong ka jingiakhun, ka la dei shisha ka jingiakhun kaba itynnad bha bad ha ka minit kaba 48 ka FC Goa, ka la ioh ban pynphai ia katei ka kol ha ka dur jong ka Penalty bad kaba la thep da u Leander, ha ka minit ba 58 ka FC Goa ka la ioh biang ban thep kol lyngba u Devendra, katba ka Rangdajied United FC ka la lah ban pyniakhaid ha ka minit ba 61 ia kaba la thep da u Pynbha.
Katba ka jingiakhun ka la iaid shakhmat, ka FC Goa ka la ioh biang ia ka kabu ban thep kol kaba la wan biang ha ka dur jong ka Penalty ia kaba la thep da u Abawiha ha ka minit ba 79 bad ia katei ka kol, ka Rangdajied United FC, ka la lah ban pyniakhaid lyngba u Apbor ha ka minit ba 85.
Hynrei kaba la pynsngewsih eh ia ki rangialehkai ka Rangdajied United FC bad ia ki nongkyrshan, ka dei hadien ba ha ki minit shwa ban kut ka jingiakhun, ka FC Goa ka la ioh ban thep biang sa shikol, ia kaba la thep da u Vellington ha ka minit ba 90+6 jong ka jingiakhun, kaba la pynlong syndon ia ka Rangdajied United FC ba kan shah pynliem noh da 4-3 hakhmat ka FC Goa.
