Ka Kynhun ki stad saian ha ka jingialam u Dr. Khlur Mukhim, Principal ka Lady Keane College, sa shisien ki la lap biang ia kynja doh sher ba kham phylla ba la tip kum u ‘Loach’ ha ka ktien nongwei na ki lai tylli ki krem ba don ha South Garo Hills, ba markhap pud bad ka Bangladesh, ong ka tyllong khubor.
Une u kynja doh sher u dei u kynja doh um ba par sha tduh jong ka um bakhuid bad la ju lap ruh ha ki wah ba don ha South East Asia bad ia une u kynja doh sher ba thymmai ba la tip ruh kum u Schistura sonarengaensis la pyntip ba la lap ha ki 3 tylli ki krem um ba don ha South Garo Hills district bad kine ki krem ba la lap ia utei u kynja doh sher ka dei ka krem Sonarenga, krem Nakama bad ka krem Chiabol, ong kitei ki stad shemphang shaphang ki kynja doh um.
Da ka jingkyrshan tyngka lyngba ka Lucknow-based ICAR – National Bureau of Fish Genetic Resources, ia une u kynja doh um ba la tip kum u Loach la lap da ka kynhun ki stad saian na ka Lady Keane College bad ka Guwahati University. Ka kot kaba batai shaphang kane ka jingwad bniah ia kitei ki kynja doh um ba kham pher la pynlait paidbah ruh mynta ka sngi da u Wiley-Blackwell, uba dei u international Journal of Fish Biology jong ka Fisheries Society ka British Isles.
“Kine ki kynja jingthaw ba im hapoh ki um kum u nemacheilid loach, Schistura sonarengaensis sp. nov, la ai jingbatai na ki lai tylli ki krem ba kitei ki kynja doh sher ki im ki sash (Barak-Surma-Meghna drainage) ha South Garo Hills district jong ka jylla Meghalaya, India,” iathuh u Wiley-Blackwell ha kane ka kot kaba ki la pynlait paidbah.
U la ong shuh shuh ba ki genes (shap jingim) jong kine ki doh sher ki ia pher na kiwer pat kiba la don record lypa, kaba pyntikna ba kine ki sher kidei ki bym pat ju don ba lap ha ki jingwadbniah jong ki.
Ka krem Sonarenga, ka don kumba 10KM sharum na ka Krem Siju ha ka lynti kyndong ban leit sha Baghmara.
Ki jingbun bad rukom thoh-iong ki snep jong une u dohsher bathymmai ki kham pher na kiwei pat ki dohsher ba marjan ia kiba ki saiantis ki la batai ha ki snem ba la dep, kum u Schistura sijuensis (na Krem Siju, South Garo Hills, da u Ambat Menon, 1987) bad Schistura syngkai (na Twahdidoh ka Ri Lyngngam, da u Khlur Mukhim, 2019).
U Dr Mukhim u da sngewnguh eh ia u Milton M.Sangma bad ki paralok jong u kiba la iarap shibun ha ki jingleit rung krem jong u ha ki Lum Garo.
