Shillong, Naitung 03: Ka kynhun nongwad bniah na ka Zoological Survey of India (ZSI), Shillong, bad ryngkat ka jingiatrei lang bad ki paralok Nongwad bniah na ka ZSI, Pune bad Itanagar, ki la lap ia ki jait jakoit, kiba long kham phylla lyngba ka jingwad bniah na ka khlaw jong ka Tale Wildlife Sanctuary, kaba don ha Arunachal Pradesh, India.
Ia kane ka jinglap ia kine ki kynja jakoit ba kham phylla la ai kyrteng lyngba kane ka kynhun kum ki, ‘Xenophrys apatani’, kumba la pynpaw da kine ki kynhun nongwad bniah.
Haba leit wad bniah halor ka jinglap ia kitei ki kynja Jakoit ba phylla bad bym pat ju lap satia la ialam da u Bhaskar Saikia bad u Bikramjit Sinha na ka ZSI, Shillong, bad kynthup ruh ia u K. P. Dinesh bad A. Shabnam na ka ZSI, Pune bad Ilona Jacinta Kharkongor na ka ZSI, Itanagar.
Kane ka jinglap thymmai ka la pynkylla ne kham pynpher ia ka kaiphod kaba la lap kham mynshuwa shaphang ki jakoit Maosan (Xenophrysmaosonensis) ha India, kumba la ai kaiphod da ki nongwad bniah ka ZSI, Shillong ha u snem 2019. Haba pynkut ia ka jingwad bniah, ha kaba ia dei bad kane ka jinglap thymmai la leh hadien ba la wad bniah bha bad la pynpaw ba ka don ka jingiapher hapdeng kata ka Indian specimen bad X. maosonensis na Vietnam bad China, kaba la pynlong ba ki dang hap ban wad kham bniah.
Kane ka jinglap ia kine ki kynja Jakoit ba phylla ba la tip kum kita ki Xenophrys apatani, ka pynpaw ba ka ri India ka long kaba riewspah ha ka jingdon jong ki kynja ba im bapher bapher bad ka pynpaw ruh ba ka long kaba kyrpang eh ba ngin pule ne wad bniah ban sngewthuh shaphang ka jingriewspah, kaba ngi don na ka bynta ka pateng hapoh ka mei mariang.
Ia kine ki kynja Jakoit la ai kyrteng kyrpang na ka bynta ka jaid bynriew Apatani ha Arunachal Pradesh, kiba dei ki jaid bynriew kiba im bad kiba shong ba sah ha ka them Subansiri jong ka jylla Arunachal Pradesh bad ba la bna nam ruh ia kine ki jaid bynriew kum kita ki jaid bynriew kiba don ka jingkitkhlieh kaba khrpang na ka bynta ban pynneh pynsah ia ki jingthung bad ki mrad khlaw bapher bapher kiba don hapneh ka mei mariang.
Kane ka kynhun wad bniah, ka ai ruh ia ka jingshemphang ban pyntip ia baroh ki kynja ba im kiba don hapneh ka mei mariang, hapoh ka ri India bad ruh sha ka thain Eastern Himalaya bad Indo-Burma, ki jaka ba pawnam jong ki jingthaw ba im hapoh ka ri. Kane ka jinglap la khmih lynti ruh ba kan sa long ka jingiarap kaba khraw na ka bynta ban pynneh pynsah bad ruh ban kyntiew ban pynsngewthuh ia ka jingkylla ki mrad ba im ha um ha kane ka thain.
La ong ruh ba kane ka kynhun ka dei kajuh ka kynhun, kaba la lap ia ki kynja jakoit ha Siju ba la tip kum kita ki (Amolops siju) na ka krem Sijua kaba don ha South Garo Hills, ha u snem ba la dep.
Haba kren shaphang ka Zoological Survey of India: ka Zoological Survey of India, ka dei ka tnad treikamha ka ri India, kiba dei na ka bynta ban peit kyrpang ia ka jingwad bniah ne ka jingpule shaphang ki mrad bapher bapher bad ka don ruh ka bynta kaba kyrpang eh ban iada kyrpang ia baroh ki kynja ba im kiba ngi lah ban shem hapoh ka ri India.
