Nongpoh, Naiwieng 23: Haba pynkut pynwai noh ia kawei na ka tournament ba la tip kum ka 10 A Side Football Tournament ba la pynlong da ka Raid Nongkyrla, ha madan Dehal Bagan ha ka thain Byrnihat, ka Byrnihat proper FC ka la ioh khur iaka nam lahduh da kaba ka la pynrem noh ia ka 20mer FC da 4 la 1 kol ha ka jingiakhun kaba la shongshit bha kata naduh ka kylla step haduh ka kylla miet.
Ia kane ka tournament la wan ban pynhap pyrda da u Bah Phrangsngi Syngkli, Lyngdoh ka Raid Nongkyrla kum u kongsan bad la sakhi lang ruh da ka jingdon lang u Bah Livingstone Nongrum Secretary ka Raid Nongkyrla, u Bah Johny Syiem Secretary ka Synjuk ki Rangbah Shnong, Byrnihat Area, ki Rangbah Shnong, ki nongïalam ka Raid Nongkyrla bad kiwei kiwei ki riew rangbah.
Kum ka jingpynshlur ia ka kynhun ba lapoi sha ka phinal, naka liang ki bor pynïaid kila sam ruh da ka song pisa sha ka kynhun kaba jop bad kumjuh ruh kaba rem ryngkat ki trophy bad la sam ruh ïaki khusnam shimet bad ki bor pynïaid kila pyntip ruh ba katei ka tournament yn bteng ban pynlong man la u snem ban kyntiew ïaka kam ïalehkai hapoh ka Raid baroh kawei.
Kum ban pynkynmaw, kane ka lympung ïalehkai la wan ban shim bynta haduh 38 tylli kiba la ïashimbynta, hadien ba ka Dorbar Raid hapoh ka jingïalam u Lyngdoh Raid u Bah Phangsngi Syngkli kila shim ïaka sienjam ban pynlong da katei ka lympung naka bynta ban lum ban lang ïaki samla hapoh ka Raid khatam ban wanrah ruh ka jingïajan bad ka jingïatylli jong ki shnong ki thaw hapoh ka Raid.
