Kumba ka sorkar Assam ka la bteng ban pynpra ia ki dukan bad ki ing ba la wan shna beain da ki briew kiba na shabar ka jylla ha ki jaka ka NHAI ba hap ha ka jylla Assam, ka seng FKJGP bad KSU Byrnihat Circle mynta ka sngi ki la pynpaw ia ka mynsiem jong ka jingbym shngain, namar kitei kiba la duh lut iaki ing ki sem ne ki dukan ki lah ban wan wad jaka rieh tngen sha Meghalaya, namar katei ka jaka ba la shah pynpra ha ka sorkar Assam ka don ha khappud ka Meghalaya bad Assam.
Kine ki jingshah pynpra ki dukan bad ki ing ki sem ki kynthup naduh na Jorobat sha Byrnihat ha kaba da ki spah tylli ki dukan bad ki ing ki sem ba la shna harud ka surokbah NH-6 markhap ka Meghalaya bad ka Asam ki la shah pynpra na ka daw ba ki wan ban shong ban sah beain.
Halor kitei ki Nongrim, u Vice President ka FKJGP North Khasi Hills District bad u Samla Maitlynti Klei, General Secretary ka KSU Byrnihat Circle, ki la ong ba ki sngewkhia na katei ka jingjia bai oh lehse kito ki bar jylla kiba la duh ki ing ki sem ne ki dukan kin wan ban riehtngen sha ki shnong ha Meghalaya kiba don markhap bad ka Assam.
Ki la kyntu ruh naduh ki bor shnong, ki samla, ki paidbah nongshong shnong, ki nongaiwai ing ba kim dei ban pdiang lada wan riehtngen kitei ki briew kiba la duh ia la ka ing ka sem, namar kumba la paw la sngewthuh ba ki dei kiba ym don kot don sla bad ki dei ki poi wir poi hap bad dei namar kane ka daw ka sorkar Assam ka la pynpra ia ki dukan bad ki ing ki sem na ka daw ba ki shu wan shong ne sah beain.
Ha kajuh ka por, kitei ki nongialam ki la kyntu ruh na ka bor synshar District na Ri Bhoi bad ruh ia ka sorkar jylla ba kan phah lem ban peitngor ia kane ka jingma, ba khlem pep kito ki bar jylla kiba ym don kot don sla bad kiba wan shong beain ha kitei ki jaka jong ka Assam ki lah ban wan riehtngen ne wad jaka sha ki shnong ba hap ha ka jylla Meghalaya.
