Ka State Surveillance Officer on Rabies ka Dr Valerie Laloo kala pyntip ba ha u snem 2023-2024 ki don haduh 27 ngut ki biew kiba khlad namar ka jingpang Rabies.
Haba kren sha ki lad pathai khubor, ka Dr Laloo ka la ong ba tang ha u snem 2024, la ïoh jingtip ba ki don 16 ngut kiba ïap bad baroh kidei hi namar ka jingpang Rabies.
Ka Dr Laloo kala ong ba 96% na ka jingpang Rabies hapoh ka Jylla ka dei hi namar ka jingshah dait ksew surok bad watla kane ka jingpang ka long kaba lah ban sumar 100% hynrei namar ka jingartatien, ki nongshah dait ksew kim shym la wad jingiarap na ki doctor ne ki jaka sumar.
“Ha u snem 2023, ki la don 11 ngut kiba iap bad ha u snem 2024 tang haduh u bnai Nailur ki don 16 ngut kiba iap bad baroh kine ki jingiap ki dei kiba iadei bad ka jingshah dait haki ksew surok” la ong ka Dr Laloo.
Ka Dr Laloo ka la iathuh ba ka West Khasi Hills bad West Jaintia Hills ki dei ki District kiba bun eh kiba iap naka jingpang Rabies ha kaba ki don mar 6 ngut ha kawei kawei ka District kiba la iap.
Ka la pyntip ba ka tnad ka koit ka khiah ka la shim iaka rai ban buh hakhmat eh iaka jingpynsngewthuh paidbah shaphang ka jingpang Rabies ha kylleng ka jylla, khnang ba ki paidbah kin wan shakhmat ban shim injekshon lada shah dait ksew.
“Sngewbha shim ia ka jingshah dait ksew kum ka jingjia kaba donkam ban sumar kyrkieh bad kino kino kiba shah dait la ka long haki khun ksew, ki ksew bari ha iing ne haki ksew surok, dei ban sumar kyrkieh bad dei ban leit kyrkieh sha ki jaka sumar namar ki dawai sumar ki don ha baroh ki PHC ha kylleng ka Jylla” la ong ka Dr Laloo.
Haba kylli halor ki sienjam ba la shim da ka tnad ka koit ka khiah ban tehlakam ïa ka jingpang Rabies, ka Dr Valerie Laloo ka la ong ba ka tnad ka ïatreilang bad ka tnad Animal Husbandry & Veterinary bad ka Shillong Municipal Board ban ai injek iaki ksew surok.
Kala iathuh ba ba ha u snem 2023 ka tnat kala dep ban ai injek ia palat 600 tylli ki ksew surok tang ha East Khasi Hills.
