Ka NPP Jirang Block Committee ha ka sngi Saitjain ka la pynkup burom ia ki 75 ngut ki samla pule kiba la pass bha ha ka SSLC examination 2024, kaba dei kawei na ka jingangnud ka party ban pynshlur ia ki samla pule ba kin dang trei shitom ban kiew sha ki kyrdan kiba shaneng bad ruh kaba long ka jingai mynsiem ia kiwei pat ki khun samla ba kin trei shitom ha ki jingpule jongki.
Ia kane ka jingpynkup burom la pynlong ha CTI Byrnihat, ha kaba u MLA ka Jirang u Bah Sosthenes Sohtun u la shim bynta kum u kongsan bad la sakhi lang ruh da ka jingdon lang u MDC ka Jirang, u Bah Victor Rani, u Deputy Commissioner ka Ri Bhoi u Abhilash Baranwal bad kynthup naduh ki Principal, ki nonghikai bad ki khynnah skul na ki skul bapher bapher ka Jirang Constituency.
Haduh 75 ngut ki samla la pynkup burom ha kane ka sngi ryngkat ki syrnot sah jingkynmaw bad la sam ruh ia ki khusnam kyrpang sha ka samla Ruphimon Makri ka khynnah pule kaba dang pule haka class 9 na ka skul Mt Zion Academy, kaba la jied ban leit mihkhmat iaka Ri Bhoi District sha ka PRERANA PROGRAM ha Vadnagar Ahmedabad Gujarat, ka khusna kyrpang ia u Samla Krishna Koirala uba la ioh 91.16% bad rung ha ka kyrdan ba 17 jong ka top 20 ha ka SSLC examination 2024 na ka skul Little Star Higher Secondary School Baridua bad ruh ia u samla Jonny Nongrum u ba la jop na ka Muaythai Word’s Championship ha Indonesia jong u snem 2023 bad ruh ha ka MMA Fight Guwahati 2024.
Nalor ki khusnam bad ki syrnot sah jingkynmaw ba la sam sha kitei ki samla pule, ha kane ka sngi, la ai jingkren ruh da u MLA ka Jirang u Bah Sosthenes Sohtun, u ba la pynpaw ba ka jingthmu kane ka jingpynkup burom ka long ban ai mynsiem ia ki samla pule ha ka Constituency bad ruh ban ai mynsiem ia kiwei ruh ki samla pule ba kin trei shitom ha ka jingpule ba kum ka Constituency ka dang donkam shibun ki samla kiba la biang ha ka kyrdan pule na ka bynta ban ai ka jingshakri hapoh ka Constituency.
