Kumba ka World Health Organisation (WHO) ka la dep ban pynbna paidbah ba ka jingpang khlam kaba thymmai kaba la tip kum ka Monkeypox kadei ka jingpang kaba ki ri ka pyrthei ki hap ban shimkhia kyrkieh, ia kaba la pynhap ruh ha ka thup Public Health Emergency of International Concern (PHEIC) ha ka 14 tarik u Nailar 2024, ka tnad Health and Family Welfare jong ka jylla kala pynmih ia ki hukum iada ia ki paidbah nongleit nongwan ba kin long husiar bad sumar ialade.
Katkum ka kyrwoh kaba la pyllait paidbah, la bthah ia kino kino ki briew na ka jylla, kiba leit bad wan na kino kino ki ri ka pyrthei kiba la suba ba la don kum katei ka jingpang Monkeypox ha kine ki 21 sngi kiba lah dep, ba lada ki don ia kino kino ki dak jingshitom kum ka baiong khlieh, ka jingshoh tlot bad ka jingdait buit ha ka met, ba kin phone mar mar sha u number 14410 bad 108 khnang ba ki bor jong ka koit ka khiah kin ioh ban ai jingiarap bad sumar iaki ha ka por kaba biang.
Katei ka kyrwoh ka la pyntip ruh kat haduh ka 18 tarik jong u bnai Nailar 2024, katei ka jingpang Monkeypox la lap ha ki ri ka dewbah Africa kum ha South Africa, Kenya, Rwanda, Uganda, Democratic Republi c of Congo, Burundi, Central African Republic, Congo Brazzaville, Cameroon, Nigeria, Ivory Coast, Liberia bad ruh ha ka ri United Arad Emirates jong ka thain Middle East.
Ha ri India pat, ia katei ka jingpang Monkeypox la lap nyngkong bad khatduh eh ha u bnai Lber mynta u snem 2024 ha ka jyla Kerala, lyngba uwei u rangbah uba la ju don bynta ban leit shangkai sha ki ri jong pyrthei.
Halor kane ka bynta ka Health and Family Welfare jong ka jylla, ka kyntu ruh ia ki paidbah ban nym long lamwir hynrei ba kin wad ia ki jingtip kiba bniah bad kiba thikna lyngba ki bor jong ka tnad ka koit ka khiah ka jylla.
