Shillong, Jylliew 13: Kum shi bynta ban rakhe ïa ka World Blood Donor Day, kaba dei ka sngi kyrpang na ka bynta kito kiba ju kylluid mynsiem ban ai snam ha kino kino ki jaka ai jingsumar ban pynim ïa kito ki mynsiem ba kordor kiba donkam snam ha ka pang ka shitom, ka Seng Federation of Khasi Jaintia and Garo People mynta ka sngi ka la pynkup burom ïa ki nongïalam bad ki dkhot ka Meghalaya Blood Doners Organization, kaba dei kawei na ka seng kaba la ju syniang snam sha kiba pang ba shitom.
Ïa kane ka jingpynkup burom la pynlong ha ophis treikam ka seng ha Shillong, ha kaba la don ryngkat naduh u President ba rangbah u Bah Dundee C. Khongsit, u President barim ka seng u Bah Joe Marwein, u Publicity secretary barim ka seng u Bah John Thabah, u Bah Eldie Lyngdoh, u Bah Andrias Marwein President ka Meghalaya Blood Doners Organization lem bad kiwei kiwei ki dkhot bad nongïalam ka seng.
Kumba la pynpaw da u Bah Khongsit, kane ka jingpynkup burom ka seng ïa ka Meghalaya Blood Doners Association ka long kum ka jingburom bad ka jingai mynsiem ïa kane ka seng kaba la ju shakri ban pynim ïa bun ki mynsiem ba kordor lyngba ka jingnoh synniang ïa ka snam.
Kum u nongïalam, u la kyntu ruh ïa ki nongïalam bad ki dkhot kane ka seng ba kin dang bteng ka jingshakri bad ruh ban don ka jingïatrei lang na ka bynta ban shakri bad ban phai khmat ym tang ha kaba synniang snam bad ban ïatrei lang ruh ïa kiwei kiwei ki kam kiba long ka jingmyntoi u paidbah ha ka jylla.
Sa peit ruh
