Nongpoh, K’lyngkot 22: Ki heh nongialam ka Congress ha Ri Bhoi, ia kaba la ialam da u Bah M.G Kharshanlor, President ka Ri Bhoi District Congress Committee (RBDCC), ha ryngkat ka jingdon u Bah Adrian L Mylliem Adviser, u Bah Phrangsngi Syngkli, President ka Congress Jirang Block, mynta ka sngi, ki la hiar sha ka shnong Patharkhmah, na bynta ban leit pdiang burom, ia ki nongialam bad nongkyrshan na kiwei pat ki Party, kiba la rai ialade ban pyniasoh noh sha ka Congress.
Kitei ki briew kiba la pyniasoh ialade sha ka Party Congress, ki dei ki nongialam bad nongkyrshan jong ka Party TMC bad UDP, ha kaba ki la rung sha ka Congress, da ka jingthmu ban ai ka jingkyrshan ia u Bah Victor Ranee, Kyrtong ka Congress ha kane ka Ilekshon MDC bad uba dei ruh baroh shikatta u MDC na ka Party NPP, hynrei uba la leit ban pyniasoh noh ialade sha ka Congress ha kine ki khyndiat bnai ba la dep.
Haba iadei bad katei ka jingwan pyniasoh Congress na ki nongkyrshan ka TMC bad UDP, na ka liang ki nongïalam ka seng Congress, ki la pynpaw ka jingsngewkmen kaba khraw, namar ki sngew ba lyngba katei ka jingwan pyniasoh Congress jong kitei ki nongkyrshan na kiwei pat ki Party, kan nang pynkhlain ia ka Party Congress bad khamtam eh ban pynjop ia u Bah Victor Ranee, Kyrtong ka Congress u ban sa iakhun na Jirang Constituency.
Haba ai jingkren ha katei ka sngi, na ka liang kitei ki nongialam ka Congress, ki la ong ba ka Party Congress ka dei kata ka Party, kaba trei na bynta u duk u suk bad kaba dei ruh ka Party kaba la wanrah ia ka Autonomous District Council, kata na ka bynta ban iada ia ka khyndew ka shyiap, hynrei watla katta bun na ki nongialam jong kiwei ki Party, ki sdang ban kam bad ban pynsngew bakla ia ki paidbah.
Ha kawei pat ka liang, kitei ki nongai jingkren na ka Party Congress, ki la ther tyngeh ia kane ka sorkar MDA-2 ia kaba la ialam da ka NPP kaba la pyrshang ban wanrah ïaka aiñ Meghalaya State Investment Promotion and Facilitation Act, 2024, ha kaba ki la ong ba katei ka Ain, ka dei ka Aiñ Iakjakor ban iuhroit ia ka riti dustur bad ka riti bat khyndew ban pynkupbor, ha kaba kan pynmyntoi tang ia ki katto katne ngut.
