Ka Khasi Students Union, Tyrso Unit ha ka kyrwoh kala pynpaw ia ka jingsngewkhia bad pynrem jur ia ka tnad Meghalaya Energy Corporation Limited (MeECL) ha ka jingbym shimkhia ka jongka ban khmih ia ka jingeh ka jong ki paidbah ka thain Tyrso kiba la hap ban shong dum, khlem ka bording ilektrik mynta la ar bnai kynthih.
Ka seng ka la ong ba katei ka jingduh jong ka bording ilektrik la ar bnai kynthih ka la wanrah jingeh shikatdei ia ki paidbah ha kiba bun ki liang, khamtam ia ki khynnah skul kiba hap ban khreh kot na ka bynta ki eksamin baphr bapher ki jongki.
Halor kane ka bynta, na ka liang ka seng hapoh ka jingialam jong u Playerful Mashli, President ka KSU Tyrso Unit, ki la leit ban kynduh ia ka SDO jong ka tnad MeECL ha Umiam ban pynsngew ia kitei ki jingeh kiba ki paidbah ka thain ki iakynduh.
Ka seng ka la iathuh ba na liang katei ka SDO, ka la kular ban pynbiang bording ilektrik mardor sha katei ka thain bad ban ai ruh ia ka jingiatreilang bad ka seng bad ki nongialam shnong. Ka seng ka la pynpaw ruh ia ka jingsngewbynniaw ba katei ka jingkular jong katei ka SDO ka tnad MeECL Umiam, kam iahap satia bad ka ktien bad kynnoh ruh ba kadei tang ka jingkular kai ia ka seng.
Ha kaba iadei bad kane ka bynta, na ka liang ka dawa ia ka tnad MeECL ba kadei ban pynbiang mardor ia ka bording ilektrik sha katei ka thain, bad lada kane ka kam urlong satia, na ka liang ka seng kan sa shim ia ki sienjam kiba kham tyngeh nangne shakhmat ban dawa ia ka hok ka jongki paidbah nongshong shnong katei ka thain.
