Ki nongïalam ka Khasi Student Union hapoh ka jingïalam u Samla Lambokstar Marngar President bad u Samla Donald Thabah General Secretary ka seng lem bad ki dkhot naka seng kmie bad North Khasi Hills District, mynta ka sngi kila pynieng syndon da ka khyrdop ILP ha surok bah NH 6 ha ka shnong 20 mer Pahammawleiñ ha Ri-Bhoi District ban talasi naphang ïaki mynder kiba wan rung shaka jylla hadien ka jingïai kuman jong ka sorkar pdeng ban ai ïaka Inner Line Permit bad ka jingdkhoh jong ka sorkar jylla ban pyntreikam ïaka Meghalaya Resident Security and Safety Act (MRSSA) naka bynta ban tehlakam ïaki mynder kiba rung ba mih haka jylla.
Naka liang ka seng kala khynra naphang ruh ïaki kali ha katei ka sngi ban talasi ïaki kot ki sla jong ki bar jylla kiba wan rung shaka jylla Meghalaya bala pynlong ruh ïaki bor pulit bad district ban leit sha katei ka jaka ban phah sangeh ïaka jingtalasi ïaki mynder namar ka pynthud ïaka leit ka wan ki paidbah.
Kum ban shu kdew hangne kane ka jingpynieng ka KSU ïaki khyrdop ILP ha Ri-Bhoi kam dei ka sien kaba nyngkong hynrei ka seng ha ki snem bala leit kala ju pynieng ia kum katei ka khyrdop bad ban talasi ïaki mynder ban pynbor ïaka sorkar ba kan pyntreikam ïaka MRSSA bad kumjuh ruh ban dawa ai noh ka ILP naka bynta ka jylla Meghalaya ban tehlakam ïaka jingrung jingmih jong ki mynder hynrei haduh mynta katei ka jingdawa ka dang sahkut bad ka sorkar ka dang sngap kuman kaba la pynlong ïaki nongïalam ka seng ban bitar bad ban pyni da ki kam.
Kum ba long haduh mynta ka KSU ka dang bteng ban talasi ïaki kali ha surok bah NH 6 bad ki kot ki sla jong ki bar jylla kiba rung sha ka jylla Meghalaya.
