Shillong, Jylliew 09: Ha kine ki khyndiat sngi kiba haïing hasem jong u Raja Raghuvanshi bad ka Sonam Raghuvanshi ki la iakhih paidbah ha Indore ban dawa ia ka hok na ka bynta jingshah pyniap dusmon u Raja Raghuvanshi bad ka jingjah klep ka Sonam Raghuvanshi katba ki dang wan Honeymoon sha ka jylla Meghalaya, hynrei mynta ka sngi pat tang mar ia paw pyrthei baka Sonam bad ki paralok jong ka ki don kti ban pyniap ia u Raja Raghuvanshi, uba dei u kurim jongka, ki ba haïing hasem bad ki paidbah da khongpong ki la mih pat ban pyrshah da kaba thang ia ki dur jong ka Sonam ban pynrem jur halor ka jingdonkti ban pyniap ia u kurim jongka u Raja Raghuvanshi.
Kane ka jingpyrshah bad ka jingthang ki paidbah ia ki dur ka Sonam Raghuvanshi ha Indore jong ka jylla Madha Pradesh, ka dei ruh hadien ba ki pulit ka jylla Meghalaya ki la pynthikna ia ka jingdon kti jongka bad ki 4 ngut kiwei pat kiba la shah kem ba kynthup ia uwei uba la kynnoh ba u dei u samla jongka ia uba la tip kyrteng kum u Raj Khushwaha halor ka jingpyniap dusmon ia Raja Raghuvanshi ha ka thain Sohra.
Kumba la paw ha katei ka jingiakhih, ki la pynrem jur ia ka Sonam bad kiwei pat kiba la don kti kiba la nud ban burieh ia ki kam sniew bad kaba long ruh kum ka jingpynrem ia kitei ki kam sniew ba la leh da ka Sonam ryngkat ki paralok jongka, kaba la pynlyngngoh lut ia kiba bun balang ha ka ri.
