Shillong, Jylliew 13: U Myntri ka sorkar MDA u Bah Paul Lyngdoh u la pyntip, ba ka sorkar jylla Meghalaya ka la rai ban sangeh noh ïa ka jingmudui dawa bai mynraiñ khmat pyrshah ïa ki Lad Pathai Khubor kiba heh bad ruh ïa ki katto katne ngut ki riew shimet kiba la kynthoh ïa ka jylla Meghalaya bad ïa ka Sohra, hadien ba kine ki la panmap paidbah kumba la dawa.
Kane ka jingkynthoh pyrshah ïa ka jylla Meghalaya bad ïa ka Sohra ka dei hadien ka jingjia ba sngewsih pyrshah ïa u nongwan jngohkai na Indore u Raja Raghuvanshi u ba la shah pynïap noh ha la ka kurim ka Sonam Raghuvanshi.
Haba kren bad ki Nongthoh Khubor u bah Paul Lyngdoh, u la ïathuh, ba ka sorkar jylla hadien ba la shong pyrkhat bha bad bishar bniah ruh ïa ka jingwan shakhmat jong ki Lad Pathai Khubor bad ki riew shimet kiba la panmap paidbah halor ki jingkynthoh jong ki pyrshah ïa ka jylla bad ïa ka Sohra kumta la shim ïa ka rai ban map noh ïa ki bad ruh ban nym ïaid shuh shakhmat ha kaba ïa dei bad ka jingmudui pyrshah ïa ki.
Shuh shuh ruh, u la pyntip ba ym donkam ban pynheh shuh ïa kane ka kam, namar ki Lad Pathai Khubor kum ka Times of India, Republic TV nalor ki bloggers shimet ki la wan panmap paidbah bad kane ka dei ka jingdawa na ka sorkar jylla hi, da kaba bynrap ruh ba ki bahaiing jong u Raja bad ka Sonam ruh ki la mih shakhmat ban panmap kata hi ka la biang.
“Hoid lada kim burom lem ïa kaei ba la dawa, ka sorkar kam banse ban mudui ejehar bad ban dawa bai mynraiñ khmat namar ka jingkynthoh jong ki ka la ktah shikatdei eh ïa ka jingmut jingpyrkhat, ka burom jong ka jylla bad la don ruh ki jingujor ejehar pyrshah ïa ki, hynrei mynta haba ki la wan shakhmat ban panmap kata ka dei ka jingurlong jong ka jingdawa jong ngi”, ong u Bah Paul Lyngdoh.
