Shillong, Jylliew 12: Namar ka jingdonkam ïa ki kam pynroi bapher bapher khamtam u surok ba paka ban myntoi u paidbah, ki nongïalam ka Joint Action Committee (JAC) jong ki 22 Shnong Ri Bhoi District mynta ka sngi ki leit ban buh da ka dorkhas ha u Myntri ba dei khmieh ïa ka tnad PWD u Bah Prestone Tynsong na bynta ka jingdonkam ïa u surok thymmai na Syntumaw na Umdohkha.
Ha kane ka jingleit ïakynduh ban ai ruh ïa ka dorkhas da ka JAC ha u Symbut Myntri Rangbah ba dei khmieh ïa ka tnad PWD, la lamkhmat da u MLA ka Nongpoh Constituency Bah Mayral Born Syiem, ha ka jingïadonlang ruh u Bah Charles Marngar, MLA ka Mawhati Constituency, ka Kong Rona Khymdeit, MDC ka Nongpoh lem ki Rangbah Shnong na ki 22 tylli ki Shnong.
Hadien ba la dep kynduh ïa u Bah Prestone Tynsong, u MLA ka Nongpoh Constituency, Bah Mayral Born Syiem u la ong ba ka jingdonkam ban ioh surok thymmai na Syntumaw sha Umdohkha ka dei namar ka jingdonkam ïa ki kam pynroi ha katei ka thain kaba dang donkam shibun ki lad pynroi.
U la ïathuh ruh, ba na ka liang ka JAC ka la pynpaw ruh ïa ka jingdonkam ban shna daka Jingkieng ba paka nalor ka wah Umsiang kaba don haka Shnong Pahamdingngan namar ka jingsynjor jong ka jingkieng rim.
“Ma ngi ki nongmihkhmat paidbah na Ri Bhoi District hadien ka jingpynsngew da ki Shnong jong ki 22 tylli ki Shnong, kiba la pynpaw ïa ka jingdonkam ïa ki kam pynroi, kumta mynta ka sngi kum ka kynhun ngi la kynduh ïa u Symbut Myntri Rangbah ka jylla ban aiti ruh da ka dorkhas halor ka jingdonkam ïa u surok thymmai kaba 10 km na Syntumaw sha Umdohkha kynthup ka Jingkieng ba paka halor ka wah Umsiang haka Shnong Pahamdingngan”, ong u Bah Mayral Born Syiem.
