Nongpoh, Jylliew 05: Kum kawei na ka thong ban dang kyntiew shuh shuh ïa ki kam ri jingri hapoh ka jylla, ka sorkar jylla lyngba ka tnad Animal Husbandry and Veterinary Department mynta ka sngi ki la buh ïa u mawnongrim ha Kyrdemkulai na ka bynta ban buh ïa ka ‘Regional Semen Production Laboratory and Semen Bank’, kiba dei na ka bynta ban pynkha symbai ïa ki Langbrot bad ki Blang lyngba ka National Livestock Mission (NLM).
Ïa une u Mawnongrim ban buh ïa ka Regional Semen Production Laboratory and Semen Bank, kaba dei ka jingtreikam ban pynkha symbai ïa ki Langbrot bad ki Blang la wan ban buh mawnognrim da u Bah A.L Hek, Myntri ka tnad Animal Husbandry and Veterinary kum u kongsan bad la sakhi lang ruh da ka jingdon lang u Bah F.R Kharkongngor, Principal Secretary ka tnad Animal Husbandry & Veterinary, ka Dr. M. Kharchandy, Director, kiwei ki ophisar bad ki nongri jingri na Ri Bhoi.
Ka jingwan rah ka sorkar ïa katei ka Regional Semen Production Laboratory and Semen Bank, ka dei ka thong ban dang kyntiew ïa ki kam ri jingri, na ka bynta ban ai jingmyntoi ïa ki nongri jingri hapoh ka jylla.
Haba kren ha kane ka sngi, u Bah A.L Hek kum u Myntri sorkar, u la ai ka jingkhublei kaba kyrpang ïa ka tnad Animal Husbandry and Veterinary, kiba la shim khia halor kane ka bynta ban dang pynkhlain ïa ki kam ri jingri hapoh ka jylla bad ka jingwan rah ïa kane ka Regional Semen Production Laboratory and Semen Bank kan long ka jingkyrkhu ba ngin dang lah ban pynkhlain ha kaba kyntiew ïa ki kam ri jingri.
U la ong ruh lyngba kane ka rukom treikam ba thymmai lyngba kane ka Regional Semen Production Laboratory and Semen Bank, kan long kawei na ka thong ban pynkhlain ïa ki kam ri jingri bad khmih lynti ba kane ka kan ïarap ym tang ban kyntiew ïa ki kam ri jingri bad kan ïarap ruh ban kyntiew ïa ka ioh ka kot ki paidbah ka jylla lyngba ki kam ri jingri.
Shuh shuh, u la kyntu ruh ba kane ka jingwan rah ïa kane ka Regional Semen Production Laboratory and Semen Bank, ka dei ban ai jingmyntoi na ka pateng ban sa wan jong ki nongri jingri bad kam dei ban shu kut noh khlem da ioh jingmyntoi, ha kaba ka thong ka sorkar ka long ba ki nongri jingri ki die ban myntoi lyngba ka kam ri jingri ban kyrshan ïa ki jingdonkam jong ka ing ka sem hi baroh kawei, ula bynrap.
