Nongpoh, Lber14: Kum shi bynta ban rakhe ia ka sngi kyrpang ki Longkmie bad ban lum ban lang ia ki para longkmie, ka Synjuk Ki Kynthei Katholik Shillong Archdiocese ka Zone-VI mynta ka sngi ki plie ia ka jingiakynduh kaba 11 ha Nongpoh Parish.
Ia kane ka lympung ba ar sngi la wan ban plie bad kaweh lama da Fr. Sedish Marak, uba dei u Spiritual Director katei ka synjuk kum u kongsan bad la sakhi lang ruh da ka jingdon lang ka Kong Rona Khymdeit MDC ka Nongpoh, u Bah Mathew Makdoh Nominated MDC ka KHADC, u Fr. Peter Syiemlieh Parish priest ka Nongpih, ka Kong Ibrosta Suchiang, President ka Stnjuk, ka kong Mazzarelo Nongrum Secretary lem bad ki Longkmie kiba la wan ban shim bynta na ki 6 tylli ki Parish.
Na ka liang ka Synjuk ki la buh ruh ia ka Theme, “Phi long ka mluh bad ka jinhshai ka pyrthei ” ba la not na ka Gospel u Matheus na ka lynnong kaba 5:13-14.
Ha kane ka lympung ba ar sngi ba la plie mynta ka sngi bad ban pynkut noh ha ka sngi u Blei kaba long ruh shi bynta ka jingrakhe ia ka international women’s day la ai jingkren naduh u Fr. Sedish Marak kum u Spiritual Director bad ka Kong Rona Khymdeit bad u Bah Mathew Makdoh kum ki MDC kiba la pynpaw ba kane ka lympung ki longkmie ka long kaba donkam, namar ki longkmie ki don ka bynta ba khraw ym tang ha ki kam shakri ha ka Balang bad ki don ruh ka bynta kaba khraw ha ki ing ki sem bad sha ka imlang ka sahlang.
