Shillong, Jylliew 04: Ka kynhun ki Myntri sorkar mynta ka sngi Balang jong ka taiew ka la ai ka jingmynjur halor ka jingtyrwa ban thied ïa ka jaka kaba 6 akar na ka 11 akar na ka bynta ka jingdonkam ban dang pynheh ïa ka jaka ïaid lynti ki Liengsuiñ ha Shillong Airport.
Haba kren sha ki Nongthoh Khubor, u Myntri rangbah ka jylla, u Conrad K. Sangma u la ong, “ ngi la dep ai ka jingmynjur na ka bynta ka jingtyrwa ban thied biang ïa ka jak ana ka bynta ban pynheh ïa ka Shillong Airport”.
U la ong ruh ka jaka ba dang donkam sa 11.75 akar, ka dei ka jingdonkam na ka bynta ban pynheh ïa ki jaka ïaid lynti ïaid ki Liengsuiñ ha kaba 4.3 akar ka dei ka jaka shipai bad 6 akar pat ka dei ka jak aba dang hap ban thied na ki trai jaka ha katei ka shnong.
Namarkata, u la ïathuh ruh ba la dep ban thung da ka Committee ba la khlieh da u Deputy Commissioner ba la ai bor ba ïa kren bad ki trai jaka na ka bynta ban shim rai ïa ka dor ka mur bad ruh ki jingsiew ba la dei ban siew sha ki trai jaka.
Shuh shuh, u la bynrap ruh hadien ba la dep ïa kren ne pynbeit janai, ka song pisa kaba Rs. 72.17 klur kan sa poi na ka bynta ban siew ïa ki bai lut ksan ki jaka, ki dieng, ki jingthung jingtep, ki jingtei kiba hap ban shim na ka bynta ban pynheh ïa ka jaka ïaid ki Liengsuiñ ha Umroi Airport, u la bynrap.
