Shillong, Jylliew 04: Ha ka jingbteng biang ban wad sa ïa ka Sonam Raghuvanshi, ka kurim jong u Raja u ba la khlad noh hadien ba la shah pynïap, mynta ka sngi ki bor pulit ki la ioh pat ban tam sa ïa ka rain coat ba la suba pyndonkam da ka Sonam na ki shnong Mawkma kaba don ha thaiñ Sohra na lynti na Sohra rim sha Wei Sawdong.
Lah ban kdew, ba ki pulit na Sohra Sub Division lem ki bor pulit ka NDRF, SDRF bad kiwei kiwei, ki la sdang biang ban bteng ïa ka jingwad sa ïa ka Sonam Raghuvanshi kaba la jah lang bad la u kurim u Raja Raghuvanshi naduh ka 23 tarik Jymmang.
Ha kane ka jingleit wad sa ïa ka Sonam Raghuvanshi, ki pulit ki la hiar sa sha ka thain jong ka Mawkma naduh ka por 10 baje mynstep, bad ha kane ka jingpyrshang leit wad, ki pulit ki la lap ïa kawei ka rain coat ïa kaba la suba bad ong ba ka dei ka rain coat jong ka Sonam. Ki pulit ki dang khmieh bniah ban pynshisha halor kane ka rain coat.
Watla, ka jingpyrshang ban wad ïa ka Sonam Raghuvanshi, ka bor mariang ka la khang lad biang namar ka jingrben jong ki lyoh bad kumjuh u slap ha katei ka thain.
