Nongpoh, Jylliew 20: Ka Ri Bhoi District Yoga Sana Sport Association (RBDYSSA) ryngkat ka Yoga Cell ka Ri Bhoi College mynta ka sngi ki la rakhe lypa ïa ka International Yoga Day ha Ri Bhoi College, kaba long shi bynta ban ïa snoh kti lang ha ka pyrthei hi baroh kawei halor ka jingmyntoi na ka bynta ka koit ka khiah ki paidbah.
Ïa kane ka jingrakhe ïa ka International Yoga day la shim bynta ka Ayushi Pradhan, ADC ka Ri Bhoi kum ka kongsan bad la sakhi lang ruh da ka jingdon lang ka N. Fairly Nita Sun, SWO ka Ri Bhoi District, ka Principal ka Ri Bhoi College, ka Dr. Elizabeth Kharkongor, u Michael Mate, District Youth Officer ka Mera Yuva Bharat Ri Bhoi, ki nonghikai bad ki samla pule katei ka College ryngkat ki nongkitkam ka Ka Ri Bhoi District Yoga Sana Sport Association.
Ha kane ka sngi, ki samla pule bad kiwei de, la iohi ba ki la shim bynta ban kilamet ïa ka jingïalehkai Yoga ha ki bynta bapher bapher ka jingïalehkai Yoga, kaba long shi bynta ban pynphuh pynphieng ïa kane ka jingrakhe kaba kyrpang kaba dei shaphang ka jingïalehkai Yoga.
Ka Ayushi Pradhan haba kren ha kane ka sngi kum ka kongsan, ka la ong ba ka jingïalehkai Yoga ka dei kawei na ka jingïalehkai kilan met kaba ai jingkoit jingkhiah ïa ki nongshong shnong ka ri bad ka dei ruh ka jaid jingïalehkai kaba la ïathuh ha baroh ki ri ka pyrthei kaba lada ngi ïalehkai ngin ioh shisha ka jingmyntoi ha ka koit ka khiah bad ha ka pyrkhat ka pyrdain.
Shuh shuh, ka la ong ruh ngim da donkam ban leit lehkai sha kiwei ki jingïalehkai kiba ngi hap ban sirew da ka dor ban ioh ïa kata ka met kaba koit ba khiah bad lada ngi pynlut por tang 20 minit ha la ïing ka la biang pura ba ngin ioh ïa kata ka met kaba koit kaba khiah, namar dei tang ka jingkoit jingkhiah kaba long ka spah bah ha ka jingim jongngi ki briew.
Ha Ri Bhoi College Rakhe Ka RBDYSSA Bad Ki Samla Pule Ïa Ka International Yoga Day
