Shillong, Jylliew 30: Ki pulit ka Special Investigation Team na Meghalaya, ha ka jingnang bteng ban tohkit halor ka jingshah pyniap u nongkhaii ka Indore u Raja Raghuvanshi ha ka kurim jong u ka Sonam Raghuvanshi, hynnin ka 29 tarik ki la ioh ban kurup pat sa ia ki jingdeng Ksiar jong u Raja bad ka Sonam, ka laptop jong ka Sonam, pen drive bad kiwei kiwei ki tiar.
Ia kine ki jingdeng Ksiar bad kiwei kiwei ki tiar ki pulit ka SIT ki la ioh kurup hadien ka jingleit hiar biang sha Indore ba la lam lynti da u Shilom James kata ha ka iingsah jong u kthaw jong u kaba don ha Ratlam District ha Madhya Pradesh.
Ia kane ka jingtohkit bad ban leit sha Indore na ka liang ka SIT la lamkhmat da u Sub Inspector Bah Anthony Khongsit bad u Sub Inspector Karan Pachua ha kaba la ioh jingiarap ruh na ki pulit ka Alkapuri Police Station.
Ka jingialam ia u Shilom James sha Indore kaba dei ruh ka sien ba lai ba ki pulit ka SIT kin hiar sha Indore ka dei hadien ba ki pulit ki la ioh kumba 6 sngi ka police custody ban tohkit pyrshah ia ki 3 ngut kiwei pat kynthup ia u Shilom halor ka jingdonkti ban pynjulor ia ki sakhi ba ia dei bad ka jingshah pyniap u Raja Raghuvanshi ha la 23 Jymmang ha Sohra.
