Nongpoh, Jylliew 14: Ka Hynniewtrep Youth Development Council (HYDC) sengkmie hapoh ka jingïalam u Bah Wyraiwan Sohtun President lem bad ki dkhot mynta ka sngi kala hiar ban rung sha ki karkhana haka thaiñ Byrnihat ban wad jingtip la kitei ki karkhana ki pyntreikam ne em ïaka Meghalaya Industrial and Investment Promotion Policy 2024 ban aikam aijam ïaki trai muluk bad kumjuh ruh ïaka Minimum Wages Act 1948 (Central Act XI of 1948) kumba la pynthymmai da ka sorkar ban siew da ka dor kaba biang sha ki nongtrei naduh kiba dang sdang bad kiba la tbit ban trei ïaki kam ki jam.
Ha katei ka jingleit rung sha ki karhana naka liang ki dkhot ka seng kila tah ruh ïaki kot lyngkdop bala pynmih da ka sorkar lyngba ka tnad Labour bad Commerce and Industries ha kaba ïadei bad ka jingthungkam ba dei ban kham phai khmat bun ïaki trai muluk haki jaka sengkam bad kumjuh ruh ban siew da ka dor kumba la buh da ka sorkar, hynrei kaba sngewsih ka long ba bun naki karkhana ha katei ka thaiñ ki duna bha ka jingthung kam da ki trai muluk bad kam iahap ka dor ba siew sha ki nongtrei bad ka por ba ki trei lait noh tang katto katne tylli ki karkhana kiba pynbiang da ki nongtrei Khasi bad ruh ban siew iaka dor kaba biang.
Haba kren sha ki lad pathai khubor naka liang u Bah Wyraiwan Sohtun kum u President u la ai ka jingïaroh ïaki karkhana kiba bud ryntih ïaki kyndon hadien bala ioh ruh ban ia phylliew jingmut bad ïakren markhmat bad ki bor pyniaid ki karkhana bad kumjuh ruh ki nongtrei Khasi ba ki la bud ryntih ia ki kyndon ba la buh da ka sorkar lyngba katei ka Policy.
Ha kawei ka bynta, u la pynpaw da kaba ong ha kaba ïadei bad kiwei ki karkhana kiba pynkheiñ kyndon naka liang ka seng kan sa ujor sha ka tnad Labour ka jylla bad kumjuh ruh sha ka tnad Commerce and Industries bad lada kim lah ban pyntreikam naka liang ka seng kan sa shim da kiwei ki sienjam ba tyngeh wat ban khang tala ïakitei ki karkhana bad lyngba kane ka kyrwoh ba shai ka seng kala phah ruh sha baroh ki karkhana ban thung kam bun ia ki nongtrei kiba dei ki trai muluk kiba lah ban trei ïaka kam bad ruh ban siew iaka dor ba biang kumba la buh da ka sorkar.
