Nongpoh, Jylliew 09: Ka jingshah pyniap jong u Raja Raghuvanshi u nongjngohkai pyrthei u ba wan kai bad la ka kurim na Indore sha Meghalaya kala pynkhihwin ïaka jylla hadien ka jingshah pyniap jong u, ha ki briew hi kiba dei nabar jylla namar ka jinglaitlan jong ka rung ka mih, watla ha ki sngi kiba la dep kila mih bun ki jingshah kynthoh bad shah kynnoh pynbudnam ba dei ki trai shnong kiba donkti ha katei ka kam.
Kane ka jingjia kala pynlong ruh ïaka seng Ri-Bhoi Youth Federation (RBYF) ban dawa syndon naka sorkar ba dei ban pyntreikam noh mardor ïaka aiñ Meghalaya Residents Safety and Security Act, 2016 (MRSSA) katba ym pat lah ban pyntreikam ïa ka Inner Line Permit ba la dawa na ka sorkar kmie kaba dang sahkut haka miej jong ka Ministry of Home Affairs, bad kaba ym pat lah ban pyntreikam haduh mynta ban ïada ïaka jingwan rung kyrthep jong ki briew ba nabar ka jylla.
U Bah Bipul Thangkhiew President ka RBYF sengkmie u la ong ba kane baroh ka jia dei namar ka jinglaitlan ka rung ka mih sha ka jylla bad kum ka seng ka dap da ka jingsngewkhia katba ki kam sniew ki nang roi bad pynbudnam da ki briew na shabar ka jylla, ka jingshah kynnoh bad shah kynthoh pat ka dei ïaki trai shnong bad ki kam sniew bunsien ki ju jia dei namar ki runar kiba thmu ban leh ïaki kam sniew ki ioh ban rung laitlan khlem kano kano ka jingteh kyndon bad tehlakam.
U la pynkynmaw ruh ba kum ki kynhun sengbhalang bapher bapher ka jylla kila dawa naduh ki snem bala leit noh ban pyntreikam noh ïaka ILP haka jylla, hynrei kitei ki jingdawa haduh mynta kim pat urlong satia ha kaba naka liang ka sorkar MUA hapoh ka jingïalam jong u Dr Mukul Sangma kila pynmih ïa kawei ka aiñ kaba la tip kum ka Meghalaya Resident Safety and Security Act, 2016 (MRSSA) ban tehlakam ïa ki briew kiba rung ba mih sha kane ka jylla bad wat ha ka sorkar MDA-I ruh ba la lamkhmat da u Conrad K. Sangma ka ïingdorbar thawaiñ ka jylla ka la ai ka jingmynjur ban pyntreikam noh ïa ka ILP bad ba la phah ïa ka jingmynjur sha ka sorkar pdeng bad ka long pat kaba sngewsih ba haduh mynta kane ka kam ka dang sahkut ha ka miej jong ka sorkar pdeng ka bym pat ai satia ka jingmynjur.
U la ong ruh ba ka aiñ Meghalaya Residents Safety and Security Act, 2016 ka dei ka aiñ kabba la pynlong aiñ da ka jingthmu ban tehlakam ïa ki nongshongwai ne ki briew kiba wan rung na shabar sha kane ka jylla, hynrei kaba sngewsih ka long ba wat la kane kala long aiñ, hynrei kam don satia ka jingpyntreikam pura ïaka.
Halor ka jingtuid ki briew na shabar ka jylla ka sorkar kala mynjur ruh ban buh kawei ka khyrdop ban talasi bad pyrkhing ïaka rung ka mih ki briew na shabar ka jylla ha Umling kaba la tip kum ka Facilitation Centre, hynrei kane ka jingshna ïa katei ka khyrdop kala shu long tang ka shynrong ha kaba shipor la shu pynlong tang kum ka jaka khmih haka por ba jur bha ka khlam Covid-19 ne Corona Centre, bad mar sien kut ka khlam katei ka khyrdop kala kylla kum ka iingjah khlem pyntreikam shuh bad kane kala shu long tang ka jingpynsepei kai ïaka pisa u paidbah, la ong u Bah Bipul Thangkhiew.
U la ong ruh la jin baka don ka jingpyrkhing bad ka jingtehlakam naka sorkar lehse ki bar jylla kim da nud than ban wan leh ki kam sniew sha kane ka jylla ban pynjah burom pat ïaki paidbah ba lui lui kiba shong ba sah ha kane ka jylla, namar ka jingioh ban rung suk katba mon bad mih katba mon na ka jylla kumba katei ka jingjia ka pyni shai kdar ba kitei kiba leh ïa katei ka kam ki shu wan ban pynthohbria ïaka jylla katba ki leit phai biang sha ka jaka ba ki wan hadien ba kila dep ban leh ïaki kam bymman bad kane ka long kum ka jingpynkyndit bynriew ïaka sorkar ba ka dei ban shimkhia ban wanrah da ki aiñ kiba khlaiñ kum ka ILP bad ban pyntreikam mardor ïaka MRSSA katba ka ILP kam pat urlong haka jylla.
Namarkata naka liang ka seng RBYF kala dawa naka sorkar jylla hapoh ka jingïalam u Conrad K Sangma ba kadei ban pyntreikam noh mardor ïaka MRSSA ban tehlakam ïaki bar jylla kiba wan rung sha kane ka jylla bad kaei ka kam kaba ki leh katba ka ILP kam pat urlong namar kum ka seng kam kwah shuh ba kum kine ki jingjia kin dang jia nangne shakhmat kaba pynjah burom bad pynbudnam sniew ïaka jylla, u la bynrap.
