Shillong, Jylliew 09: U Bah Paul Lyngdoh kum u Myntri ba peit ia ka tnad Tourism ha ka jylla, mynta ka sngi u la kren shai ba ka jingjia ia ki shi kurim u Raja bad ka Sonam Raghuvanshi kiba dei na Indore na ka jylla Madhaya Pradesh kam dei kaba pynjah burom ia ka jylla Meghalaya, namar na ka liang ka sorkar ka la dep ban pynshai sha ka pyrthei ba ym dei na don kti ki briew na Meghalaya ban pyniap ia u Raja u kurim ka Sonam bad ka dei hi kaba la leh sniew daki briew na Madhya Pradesh bad na Uttar Pradesh.
Ia kane la pynpaw da u Bah Paul Lyngdoh mynta ka sngi sha ki lad pathai khubor ka jylla, ha kaba u la kren shai ba katei ka jingjia ia u Raja bad ka Sonam kam shym la pynjah burom ia ka jylla, namar na ka liang ka sorkar bad ka tnad Pulit ka la lah ban pynshai sha ka pyrthei ba dei ma ki, hi kiba don kti ha katei ka kam pyniap briew bad ym ba la leh da ki briew na Meghalaya.
U la ong ruh ba ka jylla Meghalaya ka dei ka jylla kaba pdiang sngewbha ia ki nongjngohkai pyrthei khlem kano kano ka jingpynthud ha kaba ka don ka jingshngain ia ki nongjngohkai pyrthei kiba wan na shabar ka jylla, hynrei haba ma ki hi ki leh ia ki kam sniew kumno kan ktah ia ka burom jong ka jylla kumba la dep ban pynshai da ka sorkar.
Shuh shuh, u la bynrap ruh ba ka sorkar jylla lyngba ka tnad Tourism kan dang pynbha shuh shuh ia ka jingtreikam ban kyntiew ia ki kam jngohkai pyrthei bad kan dang pynbit pynbiang ruh ia ki Standard Operating Procedure ha ka ban khring ia ki nongjngohkai pyrthei khang ba kan long kaba shngaiñ bad kaba pynsuk ruh ia ki nongjngohkai pyrhei haba ki wan ban jngohkai sha kane ka jylla Meghalaya.
