Nongpoh, Jylliew 04: Ha kawei na ka jingjia tyngkhuh Kali, kawei ka samla kynthei kaba dang 25 snem ka rta ka la duh noh ïa la ka jingim bad 5 ngut ki la mynsaw, kaba dei hadien ba ka Kali Hyundai kaba don ïa u number AS-01-EV-9578 ka la leit ban tynrah kynsan ïa kawei ka Trok ba ieng harud surok ha ka jingpyrshang ban knieh khmat ïa kawei ka Kali kaba la jia ha Shangbangla ba hap ha ka surokbah National Highway-6 ha Ri Bhoi District.
Kane ka jingjia ka la jia ha ka por 4.44 baje mynta ka step ha kaba la ong ba katei ka kali Hyundai Alcazar ka dang wan na Shillong ban hiar sha Guwahati, hynrei sniew bok noh hadien ba la poi ha Shangbangla ka la leit ban tynrah ïa ka Trok ba ieng harud surok ha ka jingpyrshang ban knieh ïaid shakhmat haduh ba la wan jia katei ka jingjia ba sngewsih ba katei ka samla ka la duh syndon ïa la ka jingim.
Kane samla ba la duh noh ïa la ka jingim la tip kyrteng kum ka Namrita Borah, 25 snem ka rta na ka Kamargaon, Golaghat Assam, ha kaba ïa kane ka Kali la niah da u MD Ismail Hoque Choudhury, 33 snem ka rta na Haripur, Darang District bad kiwei pat ki saw ngut ba ïa don lang ki kynthup u Anyatul Watus, 39 snem ka rta na Guwahati, ka Gayatri Borah, 25 snem ka rta na Mangaldai, Assam, ka Pragya Dihingia, 29 snem ka rta na Sonari, Choraidu, Assam, bad u Meriganka Borah, 26 snem ka rt ana Golaghat, Assam.
Ka khubor ba la ioh lum na ki Pulit la ong ba hadien kane ka jingjia ïa katei ka samla ba la khlad noh la wan rah ïa ka da kawei ka Kali ban shah sumar ha Civil Hospital Nongpoh, hynrei ki Doctor ki la pynbna ba ka la dep khlad lypa na ka jingmynsaw ha ki bynta jong ka khlieh ba ka trok ka la tynrah na ka liang jong ka jaka shong jongka hapoh katei ka Kali.
Katei ka Kalai ba ki shong ruh ka la jur, hadien ba la leit ban tynrah ïa katei ka Trok. Shuh shuh, la ong ba ki Pulit ka Ri Bhoi ki la pynlong ïa ka jingtohkit halor kane ka jingjia bad ïa ka met jong katei ka samla la leit buh noh ha jaka buh metïap ha Civil Hospital Nongpoh ban pyndep ïa ka Postmortem shuwa ban aiti noh sha kiba haïing hasem.
