Nongpoh, Risaw 15: Ha kawei na ka jingjia ryngkhat katba u SP ka Ri Bhoi u dang don lang ban talasi ia ki kali kiba pynkhein ain hynnin ka meit ha Nongpoh, ka long pynban kaba sngewtha mula ha kaba uwei u dribar buaid khlem salia tang ban lait na ka jingshah talasi ha ki Pulit u la tyrwa bai sha pynban da ka lut 100 ha u SP ka Ri Bhoi.
Kane ka dei ha ka por ba u SP ka Ri Bhoi u VS Rathore u dang don lang ha kane ka jingkhynra kali ha Nongpoh ba bun ki kali ba pynkhein ain ki la shah bat bad shah dain kuna, hynrei kawei na kaba la pynphuh sam rkhie pynban ia ki heh pulit ka dei ba utei u dribar jong kawei ka Kali kaba u la shah bat na ka jingdih buaid u la tyrwa pisa pynban wat ia u SP ka Ri Bhoi khlem salia ei ei.
Kane ka Kali ba la shah bat ha ki Pulit ka dei ka Bolero Pick-up ha kaba ym tang ba utei u dribar u la tyrwa pisa hadien ba la lap ba u la buaid, hynrei katei ka Kali kaba u niah ka la shah tar ruh ia ka plastic ba tah ïit iong ha katei ka kali, kaba u la ngan pynban ha ka kuna halor kane ka jingpynkhein ain naduh ka jingdih buaid bad ruh ka jingtah plastic ïit ïong ia katei ka Kali.
