Imphal, Jylliew 12: Ar ngut ki nongtrei hapoh ka liengsuiñ (cabin crew) ki dei kiba na ka jylla Manipur kiba na ka thain Lam Shatei Mihngi (North East) kiba kynthup ïa ka Nganthoi Sharma Kongbrailatpam bad u Lamnunthem Singson ki dei napdeng kito kiba la khlad noh ha ka jingjia sngewsih jong ka jinghap ka liengsuiñ Air India hajan Ahmedabad hynne ka sngi Palei nohphai sngi.
Ïa ka liengsuiñ la niah da u Captain Sumeet Sabharwal, uba dei u Line Training Captain (LTC) uba don ka jingtbit ha ka kam ñiah liengsuiñ ïa palat 8,200 kynta, ryngkat ka jingïarap u First Officer Clive Kunder, uba don 1,100 kynta ka jingtbit.
Nalor ka Nganthoi bad u Lamnunthem, kiwei pat ki nongtrei hapoh ka liengsuiñ ki kynthup ïa ki dkhot ba rangbah ka Shradha Dhavan bad ka Aparna Mahadik, lem bad ka Saineeta Chakravarti, u Deepak Pathak, ka Maithili Patil, u Irfan Shaikh, ka Roshni Songhare Rajendra, bad ka Manisha Thapa.
Lah ban kdew ba ka Air India ka la pynthikna ba ka liengsuiñ jong ka, ka AI171, kaba her na Ahmedabad sha London Gatwick, ka la shem “ïa ka jingjia aksiden” khyndiat por hadien ba ka la her noh.
Ka liengsuiñ Boeing 787-8 Dreamliner ka la mih na Sardar Vallabhbhai Patel International Airport ha ka por 1:38 nohphai sngi bad ka kit 242 ngut ki nongshong bad ki nongtrei hapoh jong ka, kynthup ïa ki 169 ngut ki nong India, 53 ngut ki nong Britain, uwei u nong Canada, bad hynñiew ngut ki nong Portugal.
La ïathuh ba ka liengsuiñ ka la hap ha ka hostel jong ka BJ Medical College, kaba don harud ka Civil Hospital ha Ahmedabad. Kane ka jingjia ka la jia ha ka por bamja sngi haba ka jaka bam jong ka hostel ka la khapngiah da ki samla pule doktor.
