Nongpoh, Jylliew 15: Ka Ri Bhoi Youth Federation (RBYF)kum kawei na ka seng na Ri Bhoi District kaba ai ka jingshakri na ka bynta ka jaid bynriew ha ka jylla, ka la mih shakhmat ban ai khublei ïa ka kyrpang ïa ka sorkar MDA 2.0 ba la lamkhmat da u Conrad K. Sangma kum u myntri Rangbah, kaba dei halor ka rai jong kane ka sorkar ban dang pynkhlaiñ bor ïa ka Meghalaya Residents Safety and Security Act, 2016 na ka bynta ban tehlakam ïa ka jingwan wan rung beaiñ ki briew kiba na shabar ka jylla khlem kino kino ki jingteh jingkhum.
Ka RBYF ka la mih shakhmat ruh ban ai khublei ïa kane ka sorkar MDA 2.0, ka dei hadien ki jingjia hapoh ka jylla Meghalaya ba na ka jingjia ka Sonam Raghuvanshi bad u Raja Raghuvanshi, uba la shah pynïap ha katei ka kurim bad ïa ki runar na shabar ka jylla, kaba la pynlong ruh ïa ka sorkar jylla ban shim khia na ka bynta ban pynkhlaiñ bor ïa ka Meghalaya Residents Safety and Security Acts, 2016, kaba long kawei na ka aiñ kaba lah ban ïada na ka jingwan rung kynthep ki bar jylla bad ruh kum kitei ki jingjia ba pynjah burom ïa ka jylla kan nym jia shuh hadien habud haba don ka ain kaba tehlakam ïa ki briew kiba wan na shabar ka jylla.
Haba ïa kren sha ki lad pathai khubor, u President ka RBYF, u Bah Bipul Thangkhiew, u la ong ba ka RBYF ka ai khublei kyrpang ïa ka sorkar MDA 2.0 kaba la rai ban shim khia na ka bynta ban dang pynkhlaiñ bor ïa ka MRSSA, 2026 ban tehlakam ïa ki briew kiba wan na kiwei ki jylla, katba ym pat lah ban pyntreikam ïa ka Inner Line Permit ba la dawa da ki seng bhalang ban pyntreikam na ka bynta ban khanglad na ka jingwan rung beaiñ ki briew kiba na shabar ka jylla.
“Dei tang tang lada ngi lah ban pyntreikam da ki aiñ kiba klaiñ bor bad kiba don bniat, ngi lah ban khanglad na ka jingwan rung beaiñ ki briew kiba na shabar ka jylla” ong u Bah Bipul Thangkhiew, bad bynrap ruh da kaba ong, “Kano kano ka jylla kaba ym don ïa kita ki aiñ ban ïada kyrpang ïa ki trai jylla, kane ka buh jingma ïa ki trai muluk ki trai jaka kiba dang rit ka jingbun paid lada ki briew kiba la heh paid kin ioh rung laitlan sha kane ka jylla, u la bynrap.
Namarkata, katba ka sorkar jylla kam pat lah ban pyntreikam ïa ka Inner Line Permit ha kane ka jylla, kaba dei ka jingdawa kaba dang sahteng ha ka Ministry ka tnad Home Affairs, ka RBYF ka ai jingkyrshan kaba pura ïa ka sorkar MDA 2.0 ba kan dang pynkhlaiñ bor shuh shuh ïa ka MRSSA bad ruh ban pyntreikam mardor hapoh ka jylla, khnang ba kum ka jylla ka lah ban khanglad na ka jingwan rung beaiñ ki briew kiba na shabar kaba buh jingma ïa ka lawei jong ka jylla, u la bynrap.
Shuh shuh, kawei na ka mat kaba hakhamt ba ka seng ka dawa, ba nalor ka jingpyntreikam ïa ka MRSSA ha ka jylla, ka seng ka dawa ruh ba ka sorkar jylla kan pyntreikam noh ïa ka Facilitation Centre kaba don ha Umling, khnang ban ioh ban tehlakam ïa ka jingwan rung ne mih ki nongjngohkai pyrthei ne ki briew kiba wan na shabar ka jylla khamtam ba ka Ri Bhoi ka dei ka khyrdop jong ka jylla Meghalaya, u la bynrap shuh shuh.
