Nongpoh, Jylliew 15: Nga shoh jingieid ïa ki kshaid ka Meghalaya bad ka dei ka jaka kaba sngain bha na ka bynta ki nongwan jngohkai pyrthei” ong uwei u nongjngohkai pyrthei na Russia haba wan ban jngohkai pyrthei ha ka thain Dawki bad ki thain Sohra ha ka jylla Meghalaya.
Kum ban pynkynmaw, dang shen ka jingpynjah burom ka Sonam bad ki runar ka la ktah ïa ka burom ka jylla Meghalaya bad da ka jingshim khia ki bor pulit ka jylla la lah ban sei madan bad ban pynpaw ïa ki jingshisha ba ka jingshah pynïap u Raja Raghuvanshi, uba dei u kurim ka Sonam Raghuvanshi kam dei satia ba la leh da ki briew ka jylla bad ka dei hi ba la don kti da ka Sonam bad ki runar na Madhya Pradesh bad Uttar Pradesh ba sa shisien ka la wan rah biang ïa ka burom ka jylla Meghalaya kaba dei da ka jingtbit ki Pulit ka jylla Meghalaya.
Une u nongjngohkai pyrthei uba la shoh jingieid ïa ka jylla Meghalaya, u dei uba la tip kyrteng kum u u Sergey Doykin na ka nongbah Lermontov, North Caucasus jong ka ri Russia bad u la pynlut por 4 sngi ha ka jylla Meghalaya da kaba u la leit sha Dawki kum ha ka Shnong Pdeng bad sha ka thain Sohra ban peit ïa ki kshaid ba itynnad bad ka jingkieng Jri (Double Decker Living Root Bridge) ha Sohra bad kiwei kiwei ki jaka jngohkai pytrhei.
U Sergey Doykin na ka ri Russia, u dei ruh uba trei mynta la bun phew snem ha Bangladesh ha ka Nuclear Power Plant bad hadien ka jingioh shuti u la wan shangkai pyrthei sha Meghalaya, ha kaba mynta u la sah la 4 sngi ha Meghalaya bad mynta ka sngi u la hiar sha Guwahati na Shillong da kaba u pyndonkam tang da ka Cycle na Shillong ban leit sha Guwahati.
Haba kylli shaphang ka Meghalaya, u Sergey Doykin u la ong ba nga shoh jingieid shisha ïa ka jylla Meghalaya kaba dei ka jaka ba long lum bad kaba don tang da ki jingitynnad suda ha ka mariang naduh ki kshaid, ki wah, ki jingkieng jri bad kiwei kiwei. Ngan sa wan shangkai biang sha Meghalaya da ka ioh biang ïa ka por ba nga tip ba ka jylla Meghalaya ka dei ka jylla ba shngain bha na ka bynta ki nongjngohkai pyrthi, u la ong.
U la ong ruh ka khubor kaba nga pyndonkam da ka Cycle ban leit na Shillong Sha Guwhati ruh, ka dei kaba nga kwah ban ioh jingkoit jingkhiah kum kata ka jingkyllan met bad nga sngewtynnad ruh ïa ki Khasi ba bun ki pynlut por ha ki kam ïalehkai sport khamtam ha ka kam ïalehkai phutbol, ki badminton bad kiwei kiwei ki kam sport, u la ong.
