Nongpoh, Nailur 30: Kum shi bynta na ka jinglehkmen na ka bynta ki Nurse kiba la pyndep ia ka jingpule, ka St. Joseph Academy of Nursing Umtrew ha Ri Bhoi District mynta ka sngi ka la pynkup burom ia ki 27 ngut ki Nurse kiba la pyndep ia ka General Nursing and Midwifery jong u snem 2021-2024, ha kaba ia kane ka jingpynkup burom la pynlong ha Meba-ai Resort kaba don ha Umtrew.
Ia kane ka jingpynkup burom ia ki Nurse ba la pyndep ia ka jingpule na kane ka shlem ai jinghikai la wan ban shim bynta da u Dr. Ricky AJ Syngkon, uba dei u MP ka Shillong kum u kongsan bad u Dr. Aman War, u Director barim ka DHS kum u symbut kongsan ha ryngkat ka jingdon lang u Bah A.L Hek, u Advisor ka St. Joseph Academy School of Nursing, ka Principal ka Kong Ibanrilin Ranee, ka Managing Director ka Kong Ibalari Siangshai bad kynthup kitei ki Nurse bad ki kmie ki kpa jong ki.
Ha kane ka jingpynkup burom la ai sngewbha ruh da ki jingai sngewbha sha kitei ki Nurse kum ka dak ka jingburom halor kane ka jinglah ban pyndep ia kane ka jingpule jong ki.
Haba kren kum u kongsan, u Dr. Ricky AJ Syngkon u la ai jingiaroh ia kane ka St. Josepth Academy School of Nursing kiba la buh ia kane ka shlem ai jinghikai ban pyntbit ia ki samla ha kaba ia dei bad ka jingdonkam ban ai ka jingshakri sha ki paidbah khamtam ha ka pang ka shitom.
Da kaba ai jingiaroh ruh ia ki samla ba la pyndep ia kane ka jingshah ai jinghikai halor ka kam Nurse, u Dr. Ricky AJ Syngkon u la ong ruh ba kane ka sngi ka dei ka sngi kaba sah jingkynmaw la kin bteng sha ki jingpule kiba kham shaneng ne kin sdang ban ai ka jingshakri ha ki jaka ai jingsumar bapher bapher haph ka jylla kaba long ka jingmyntoi ia ki paidbah.
